«Almaty-Taldyqorǵan» joly qashan tolyq paıdalanýǵa beriletindigi belgili boldy

ASTANA. QazAqaparat - Almaty-Taldyqorǵan jolynyń qalǵan 2 shaqyrymǵa jýyq bóligindegi jumystar kúzde tolyq aıaqtalady. Bul týraly búgin halyqpen eseptik kezdesýin ótkizgen QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.

Kezdesý barysynda tikeleı efır arqyly baılanysqa shyqqan Taldyqorǵan qalasynyń turǵyny mınıstrden Almaty-Taldyqorǵan jolynyń qashan tolyq aıaqtalatyndyǵyn suraǵan bolatyn.

«Byltyr Almaty men Taldyqorǵannyń ortasyndaǵy joldaǵy jumystardy bitirdik. Qalǵan sońǵy ýchaske - Balpyq bı aýyly. Biz osy aýyldyń turǵyndarynyń usynysymen jobalyq qujattardy  ózgerttik.  Qalǵany 1,5-2 shaqyrym. Ol ýchaskedegi jumystar osy kúzde bitedi dep josparlanýda. Jalpy, Almaty men Taldyqorǵandy qosatyn joldaǵy jumystar tolyǵymen kúzde bitedi», - dedi Jeńis Qasymbek.

Onyń aıtýynsha, Almaty oblysynda jol salasynda kóptegen jumystar atqarylatyn bolady.

«Osy jyly Taldyqorǵannan Aıagóz, Semeıge, Qalbataýǵa Óskemenge baratyn joldy bastaımyz jáne Almatydan Jambylǵa, ary qaraı Balqash, Qaraǵandyǵa baratyn  joldardy, onyń ishinde Kúrtiden Býrylbaıtalǵa deıin joldy jańǵyrtamyz. Almaty oblysynda munan bólek basqa da kóptegen joba bar», - dedi mınıstr.