«Almaty soǵys jyldarynda» atty kórme ashyldy
Kezdesýge eńbek ardagerleri men Uly Otan soǵysy taqyrybyn zertteýshi, tarıhshy ǵalymdar jáne qalamyzdyń mektep, gımnazııa oqýshylary qatysty. Kórmeniń ashylý saltanatynda eńbek ardagerleri soǵys jyldary atqarǵan eńbekteri týraly estelikterimen bólisti, al tarıhshy ǵalymdar tyl taqyrybynyń ózekti máseleleri jaıynda sóz qozǵady. «Jeńiske jetýde, tyl maıdangerleriniń eren eńbegi zor. Árqashan Uly Otan soǵysy týraly sóz etkende, olardyń qosqan úlesin atap aıtyp otyrýymyz kerek», - dep atap ótti tarıh ǵylymdarynyń kandıdaty Qaıdar Aldajumarov. Onyń aıtýynsha, bul sharanyń jastar boıyna patrıottyq tárbıe berýde úlken mańyzy zor.
Kórmege alǵash ret mýzeı qoryndaǵy sırek kezdesetin soǵys, tyl taqyrybyna qatysty jádigerlerdiń túpnusqalary qoıylǵan. Almaty qalasynda jeńis úshin qyzmet jasaǵan kásiporyndardyń ónimderi, sonymen qatar eńbek ardagerleriniń soǵys jaǵdaıynda eńbek etip, jeńiske qosqan úlesteri úshin alǵan orden, medaldary da kórmeden laıyqty oryn alǵan.
Soǵys jyldarynda Qazaqstan asa iri ónerkásip ortalyqtarynyń birine aınaldy. Elimizge 220-dan asa mekemeler, kombınattar, tsehtar men artelder kóship kelip, jumys jasady. Tek Almaty qalasynda ǵana 40-qa jýyq zaýyt, fabrıka jáne tsehtar ornalastyryldy. Olardyń arasynda S.M. Kırov atyndaǵy Almaty aýyr mashına jasaý zaýyty, Karocharov mehanıkalyq zaýyty, Harkov elektrotehnıkalyq zaýyty, Lýganskıı parovoz jasaý zaýyty, kondıter fabrıkasy, shuǵa, toqyma jáne t.b. mekemeler boldy. Bul mekemeler óte qysqa merzimde iske qosylyp otyrdy. Teńiz mınalary, torpedalar, snarıadtar, avaıbombalar, ushaqtarǵa arnalǵan pýlemetter, radıostansylar, shınelder, ish-kıim, ton, etikter, azyq-túlik jáne maıdanǵa qajetti basqa da ónimderdi Almatynyń eńbekqor jumysshylary daıyndap, jiberip otyrǵan bolatyn. Jumysshylar men qyzmetkerler 12 saǵattan astam jumys jasap, jospardy 2-3 ese artyq oryndap otyrdy.