Almaty Smart Cities Moscow halyqaralyq onlaın forýmyna qatysty

ALMATY. QazAqparat - 25 mamyr kúni Máskeýde eki kúndik onlaın forým bastaldy, oǵan álemniń 20 elinen aqyldy qalalar salasyndaǵy mamandar qatysyp jatyr. Olardyń qatarynda Almaty qalasynyń ákimi Baqytjan Saǵyntaev pen tsıfrlandyrý basqarmasynyń ókilderi bar, dep habarlaıdy QazAqparat tilshisi.

Almatynyń tsıfrlandyrý basqarmasynyń basshysy Baıan Qońyrbaevtyń aıtýynsha, forým barysynda Almaty ákimi Baqytjan Saǵyntaev pen Máskeý meri Sergeı Sobıanınniń qatysýymen sessııa ótti.

«Sessııa jumysyna Beıjiń qalasynyń meri Ch. Tszının, Fort-Loderdeıl meri D. Trantalıs, qalalyq derekter jónindegi dúnıejúzilik keńestiń prezıdenti P. Makkarnı, BUU bólimsheleri men halyqaralyq uıymdardyń ókilderi qatysty. Postkovıd kezeńinde qalalarda tsıfrlandyrýdyń róli, qalalar úshin qoldanbaly sheshimderdi damytý týraly máseleler talqylandy», - dedi Baıan Qońyrbaev.

Sonymen qatar, ol Almaty ákimi qalanyń tynys-tirshiligine qatysty jedel sheshimder qabyldaýǵa týra kelgen koronavırýs pandemııasy bastalǵan kezeńde iske asyrylǵan tsıfrlyq jobalardy aýqymdandyrý tájirıbesi týraly aıtyp bergenin tilge tıek etti.

«Almaty tsıfrlandyrý basqarmasynyń ókilderi forýmnyń plenarlyq sessııasyna Sıngapýrden, Eýroodaq elderinen, Azııanyń basqa da birqatar qalalarynan kelgen mamandarmen birge qatysty»,- deıdi ol.

Halyqaralyq onlaın forýmnyń arqasynda tsıfrlyq tehnologııalardy damytý salasyndaǵy qazaqstandyq mamandar Eýropa, Afrıka, Taıaý Shyǵys, Soltústik jáne Ońtústik Amerıka elderindegi áriptesteriniń sheteldik tájirıbelerin jaqsy zerdeleı aldy.