Almaty saıabaǵynda kepterlerdiń qyrylýyna ne sebep boldy

ALMATY. QazAqparat – Almaty ákimniń birinshi orynbasary Erlan Qojaǵapanov Panfılovshylar saıabaǵynda kepterlerdiń qyrylýyna ne sebep bolǵanyn aıtty, dep habarlaıdy QazAqparat tilshisi.

Onlaın-brıfıng barysynda qala ákiminiń orynbasary 28 Panfılovshy saıabaǵynda ólgen kepterlerdiń máselesine toqtalyp ótti.

«Kepterlerdiń ólý sebebi týraly ártúrli boljamdar aıtylýda. Máselen, keı mamandar olar ashtan ólýi múmkin degendi alǵa tartady. Sebebi buǵan deıin olardy adamdar tamaqtandyryp kelse, saıabaq jabylǵaly qaraýsyz qalǵan»,– deıdi Erlan Qojaǵapanov.

Onyń aıtýynsha, kepterlerdiń dezınfektsııadan zardap shegýi múmkin emes.

«Bul saıabaq 19 naýryzda zalalsyzdandyrylyp, 20 narýyzda jabyldy. Al qustardyń ólgeni týraly málimet 25 naýryz kúni tarady. Sondyqtan olardyń neden ólgeni túsiniksiz»,– dedi ol.

Qojaǵapanov kepterlerdiń qyrylýynyń taǵy bir múmkin nusqasyn atady.

«Qysta ol jerde muz aıdyny boldy. Sol kúnderi ol jerde demontaj jumystary jasaldy, sonyń qaldyqtaryn jegen kepterler ólgen bolýy da múmkin. Óıtkeni Almatynyń ózge jerlerinde ólgen qustar tirkelmedi», - deıdi ol.

Sondaı-aq, ol kepterlerdiń zerthanalyq saraptamaǵa jiberilgenin aıtty. Nátıjesi búgin keshke daıyn bolyp qalýy kerek.

Buǵan deıin QR Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet kepterlerdiń ýlanýy múmkin ekenin aıtqan.