Almaty prokýrorlary 17 mlrd teńgege memlekettik satyp alýdyń kúshin joıdy

ASTANA. QazAqparat - 2023 jyldyń basynan beri prokýrorlardyń aktileri boıynsha 17 mlrd teńgeden astam somaǵa 46 konkýrs joıyldy, 10 adam tártiptik jaýapkershilikke tartyldy, 9 memlekettik uıymnyń basshylaryna 5 mln teńgege aıyppul salynyp, ákimshilik jaýapkershilikke tartyldy, dep habarlaıdy QazAqparat.

Bas prokýratýranyń málimetinshe, tapsyrys berýshiler áleýetti ónim berýshilerge joǵary biliktilik talaptaryn qoıǵan, konkýrstyq qujattamany tolyq usynýdy qamtamasyz etpegen, satyp alý tásilin durys tańdamaǵan.

Osy jyldan bastap, memlekettik satyp alýdy ótkizýdiń ashyqtyǵy, sybaılas jemqorlyq táýekelderin boldyrmaý maqsatynda satyp alý tásilderiniń biri reıtıngtik-baldyq júıe (RBJ) qoldanylady.

Ol konkýrsqa áser etetin usynystardy, krıterıılerdi avtomatty túrde salystyrady jáne jeńimpazdy komıssııanyń qatysýynsyz anyqtaıdy, ıaǵnı adamı faktorsyz, ótinimderdi usyný merzimi aıaqtalǵannan keıin memlekettik satyp alý qorytyndylary týraly hattama qalyptastyrady.

Sonymen qatar, Almaty qalasy prokýratýrasy monıtorıng arqyly tapsyrys berýshilerdiń biri avtojoldar salý kezinde elektrmen jabdyqtaý jelileri salasynda lıtsenzııalanatyn qyzmettiń bir túriniń mindetti túrde bolýy týraly kásipkerlerge negizsiz talaptar qoıǵany anyqtaldy.

Bul konkýrs qorytyndylaryna áser etý retinde qarastyrylady.

Prokýratýranyń qadaǵalaý aktisi boıynsha konkýrs toqtatyldy, memlekettik satyp alýǵa qatysýǵa áleýetti ónim berýshilerdiń teń sharttaryn saqtaı otyryp, qaıtadan ótkizildi.