Almaty prokýratýrasy ekstremıstik aqparat taratqan 300 saıtty japty

ALMATY. QazAqparat - Almatyda dinı basqarma ókilderi men prokýratýra ókilderi bas qosyp, qaladaǵy dinı ahýal jaıyn talqylady. Dóńgelek ústel Elbasynyń din ókilderimen kezdesý kezinde aıtqan usynystaryn júzege asyrý aıasynda ótti.

Dóńgelek ústel qatysýshylary salafızm, radıkalızm jáne ekstremızm máselelerin, sonymen qatar jastar sanasynda qalyptasqan dástúrimizge saı kelmeıtin qazaq qoǵamyna jat túsinikterdiń syrtqy kórinisteri jaıly talqylady.

Qala prokýrory Ǵabıt Mırazov, onyń orynbasary Jandos Ómirálıev, Almaty ákiminiń orynbasary Arman Qyryqbaev, dinı uıymdardyń basshylary, ımamdar halyqtyń dinı saýattylyǵyn arttyrý tetikterin talqylady. 

Qalalyq prokýratýra basqarmasynyń bastyǵy Sábıt Shembekovtyń aıtýynsha, atalǵan mekemeniń muryndyq bolýymen ekstremıstik saryndaǵy aqparat taratqan 300 saıt jabylǵan.

«Ózderińiz biletindeı Elbasy jaqynda ǵana din ókilderimen kezdesip, dástúrli dinimizdi nasıhattaý jumystaryn tapsyrdy. Qala prokýratýrasy  osy baǵyttaǵy jumystardy naqty jetildirý úshin usynystar engizdik. Atap aıtsaq, qoǵamǵa, jastarǵa túsindirý jumystaryn júrgizip, ózara suhbat ótkizip jatyrmyz. Sońǵy eki jylda bizdiń tarapymyzdan  teris dinı aǵymdardy jabý úshin 300 usynys berilip, ol resýrstardyń barlyǵy jabyldy. Olardyń kóbinde destrýktıvtik aqparat taratylǵan», - dedi S.Shembekov.