Almaty polıtsııasy joldaǵy qaýipsizdikti qalaı arttyratynyn baıandady
Almaty qalasynyń Polıtsııa departamenti 2020-2023 jyldarǵa arnalǵan megopolıste jol qozǵalysyn uıymdastyrý jáne jol qaýipsizdigin jaqsartý boıynsha keshendi jospar ázirledi. Jospar bes bólimnen jáne 38 tarmaqtan turady. Onda jol qozǵalysyn basqarýdyń tıimdiligin, jaıaý júrginshilerdiń qaýipsizdigin arttyrý, jol jáne kóshe ınfraqurylymyn jaqsartý, avtoturaq alańyn damytý máseleleri qamtylǵan.
«Qazirgi ýaqytta avtomattandyrylǵan jelini basqarý júıesin jańǵyrtý jumystary júrgizilýde. Bul júıe naqty ýaqyt rejıminde qıylystardaǵy qozǵalysty retteýdi, osy baǵyttaǵy naqty qozǵalys qarqyndylyǵyn, kólik quralynyń qozǵalys statıstıkasyn esepteýdi, onlaın rejıminde keri sanaq tablosynyń jumysyn, mamandandyrylǵan kólik quraldarynyń basymdylyǵyn eskere otyryp qamtamasyz etedi. Zamanaýı eýropalyq jabdyqtar men kólik detektorlaryn qoldana otyryp, baǵdarshamdardaǵy onlaın basqarý qıylystardyń ótkizgishtigin 18-20% arttyrýǵa jáne kólik quraldarynyń aıaldamalaryn 20-40% azaıtýǵa múmkindik beredi. Sondaı-aq, bul atmosferany lastaýshy zattar shyǵaryndylarynyń kólemin 25-35% jáne jol-kólik oqıǵalarynyń sanyn 20% deıin tómendetýge múmkindik beredi», – dedi Almaty qalalyq Polıtsııa departamentiniń bastyǵy Qanat Taımerdenov.
Qazir qalada júrý taqtasymen retteletin 73 jaıaý júrginshi ótkeli bar.
«2021 jyly biz jaıaý júrginshiler úshin joldan tártippen jáne qaýipsiz ótýdi qamtamasyz etetin 70 jaıaý júrginshiler ótkelin shaqyrý túımesimen jabdyqtaýdy kózdep otyrmyz. Sonymen qatar, joǵary jyldamdyqty tómendetý maqsatynda jaryq túsiretin materıaldan jasalǵan jol belgilerin ornatamyz. Búgingi kúni qalada segiz jer ústi jaıaý júrginshiler ótkeliniń qurylysy júrip jatyr. Bul jaıaý júrginshilerdiń qatysýymen bolatyn apattardyń sanyn 15-20% -ǵa azaıtýǵa múmkindik beredi», – dep túıindedi Almaty polıtsııasynyń bastyǵy.