Almaty polıtsııasy ishkilikke salynǵan otbasydan balalaryn alyp ketti

ALMATY. QazAqparat - Almaty polıtsııasy balalaryn qaraýsyz qaldyrǵan, jaýapkershiligi tómen otbasylardy aralady, dep habarlaıdy QazAqparat tilshisi.

Bostandyq aýdandyq ІІB janyndaǵy jergilikti polıtsııa qyzmetiniń ınspektorlary júrgizgen reıd barysynda kámelettik jasqa tolmaǵan bala tárbıelep otyrǵan, turmystyq jaǵdaıy tómen otbasy anyqtaldy.

40 jastaǵy otaǵasy polıtsııa ókilderi kelgende mas kúıinde uıyqtap jatqan. Anasy úıinde joq bolyp shyqqan.
 

Qalalyq ІІD baspasóz qyzmetiniń habarlaýynsha, úıde oınap júrgen 3-4 jastaǵy balalardyń kıimi jyrtyq, ústi-bastary las bolǵan. Úıdiń ózi apatty jaǵdaıda tur. Keshke taman jumystan kelgen anasyna polıtsııa ókilderi quqyqbuzýshylyq týraly jetkizdi.
 

«Ata-analardyń jaýapsyzdyǵy júrek syzdatady. Kishkentaı balalar úıde qaraýsyz júr. Balabaqshaǵa barmaıdy. Balalardyń ómir súrýine qaýip tónip turǵandyqtan, olardy ýaqytsha kámelettik jasqa tolmaǵandardy beıimdeý ortalyǵyna ornalastyrý týraly sheshim qabyldandy. Erli-zaıyptylar profılaktıkalyq esepke alyndy. Endi olar tez arada túzý jolǵa túspese, ata-analyq quqyǵynan aıyrý týraly másele qaralady», - dedi jergilikti polıtsııa qyzmetiniń ıývenaldy polıtsııa bóliminiń basshysy Leıla Álipbaeva.