Almaty polıtsııasy ınternet qylmyskerlerin áshkereledi

ALMATY. QazAqparat – Almaty polıtsııasy «Kontrafakt» jedel profılaktıkalyq operatsııasyn ótkizdi, dep habarlaıdy QazAqparat tilshisi.

Bir aptanyń ishinde aqparat jáne baılanys salasynda 5 qylmys áshkerelengen.

51 jastaǵy adam bildirmeı jazatyn aýdıo-vıdeo tehnıkany saýdaǵa qoıǵan. Ústelge qoıatyn saǵattan fleshka salatyn oryn men zarıad quraly tabyldy.

Bul derek boıynsha saraptama taǵaıyndaldy.

Sonymen qatar, eki adam belgili ınternet alańda elıtalyq páterdi jalǵa beremin degen jarnama taratqan.

Alaıda qolymyz tımeı jatyr dep syltaý aıtyp, aqshany elektrondy aýdarymmen jiberýlerin suraǵan.

Osylaısha ańqaý tutynýshylardyń qarjysyn ıemdenip otyrǵan.

«Búginde kóptegen qylmystar ınternet arqyly jasalady. Taraptar bir-birin kórmeı-aq mámile jasaıdy. Biri-birine esepshottary, rekvızıtteri týraly, jeke málimetterin jibere beredi. Máselen jaqynda ǵana 30 jastaǵy áıel ustaldy. Ol bir ınternet dúkennen taýar almaq bolyp, satýshydan kartanyń málimetterin suratqan. Satýshy esh kúdiksiz málimetterin bere salǵan. Sodan soń karta málimetterin paıdalana otyryp karta ıesiniń atyna mıkronesıe uıymy arqyly nesıe rásimdetken. Karta ıesine iri qarajat túsken soń habarlasyp, aqshany shatasyp laqtyryp jiberdim dep Kıvı ámııan arqyly qaıtaryp berýin ótingen. Osylaısha ol satýshynyń moınyna birneshe jylǵa nesıe ilim ketken», – dedi qalalyq PD Qylmystyq polıtsııa basqarmasynyń basshysy Janbolat Zıadın.