Almaty polıtsııasy 40 myń teńge jalaqyǵa qyzmetkerler izdeıdi
«Sońǵy kezde 102 qyzmetine narazy jurt kóbeıdi. Osyǵan oraı, qyzmetti jaqsartýdy qolǵa almaqpyz. Táýlik boıy qyzmet atqaratyn 102 operatorlarynyń sanyn arttyramyz. Bizge kemi 32 adam kerek», -dedi brıfıngte qalalyq ІІD shuǵyl basqarý ortalyǵynyń basshysy Andreı Kvashnın.
Qazirgi tańda synaq merzimindegi 10 adam testileýden ótýge daıyndalyp júr.
«Qalasańyzdar, kelińizder. Jumys tártibi kúrdeli, jalaqysy da máz emes. 12 saǵattyq jumys ýaqytynda 1 saǵat qana úzilis beriledi. Jarty saǵaty as ishýge, 15 mınýttan eki ret qajettilik týyndaǵan jaǵdaıda bosatamyz. Aılyq 40 myńnan aspaıdy»,-dedi ShBO basshysy.
Az jalaqyǵa qaramastan, úmitkerlerge qatań talap qoıylady. Zańnan habary bar , saýatty, eki tildi meńgergen, aǵylshyn tilin bilgeni artyq etpeıtin, joǵary bilimdi , moraldi turǵyda myqty azamattarǵa esik ashyq.
«Bizge pernetaqtada mátindi tez teretin, jaǵdaıdy túsine alatyn adamdar kerek»,-degen Andreı Kvashnın, ortalyqta 20 jyldan beri qyzmet etip kele jatqandardyń bar ekenin de aıta ketti.
ІІD ýáde etkendeı, eger qyzmetkerdi ishki ister organyndaǵylar attestatsııadan ótkizse, onyń mansaby da óspek.