Almaty polıtseıleri qala turǵyndaryn telefondaǵy kúmándi siltemelerge ótpeýge shaqyrdy

ALMATY. QazAqparat- Óńirlik qyzmette ótken brıfıngte Almaty qalalyq krımınaldyq polıtsııa basqarmasynyń bastyǵy Qýatbek Naýatov qala turǵyndaryn telefondaǵy kúmándi siltemelerge ótpeýge shaqyrdy, dep habarlaıdy QazAqparat tilshisi.

Aıtýynsha, bul vırýstyq faıldar men qosymshalar bolýy múmkin, olar alaıaqtardyń mobıldi bankıngtegi qarajatyńyzǵa qol jetkizýine múmkindik beredi.

«Ártúrli saıttarǵa ózińizdiń bank kartalaryńyzdyń derekterin engizbeńiz, sebebi bul sizdiń jeke aqparatyńyzdy jınaý úshin arnaıy qurylǵan, ári qaraı sizdiń bank kartańyzdan ruqsatsyz tólem jasaý úshin paıdalanylatyn «fıshıngtik» saıttar bolýy múmkin», - deıdi Qýatbek Naýatov.

Sonymen qatar, ol aqshany kóbeıtýge ýáde beretin nemese úlken aqshalaı utystar týraly habarlaıtyn ınternettegi kúmándi baıqaýlarǵa qatyspaýǵa keńes berdi.

«Azamattarǵa krıptovalıýtalarǵa, aktsııalarǵa, baǵaly metaldarǵa jáne taǵy basqalarǵa ınvestıtsııalaý arqyly úlken dıvıdendter beretin kúmándi jobalarǵa aqsha salmańyzdar. Sonymen qatar, alaıaqtar ártúrli elderden joq abonenttik nómirlerden qońyraý shalyp, olardyń fırmalaryna (QuestraWorld, AssetWorldManagement) ınvestıtsııalaýdyń paıdasy týraly nanymdy túrde aıtýy múmkin»,- dedi ol.