Almaty polıtseıleri 60 keli esirtki tárkiledi

ALMATY. QazAqparat - Jyl basynan beri Almaty qalasynyń polıtseıleri 60 keli esirtki tárkiledi, onyń 7 kelisi sıntetıkalyq esirtki. Bul týraly óńirlik kommýnıkatsııalar qyzmetiniń alańynda ótken baspasóz máslıhatynda qalalyq polıtsııa departamentiniń resmı ókili Saltanat Ázirbek aıtty, dep habarlaıdy QazAqparat tilshisi.

Aıtýynsha, jyl basynan beri Almatyda 205 esirtki qylmysy anyqtaldy jáne esirtki satýǵa qatysty 35 derektiń joly kesildi.
«Osylaısha, jalpy somasy 187,5 mln teńge bolatyn, 30 myń doza áleýetti tutynýshylarǵa jetpeı qaldy. Bul rette «sıntetıka» shyǵaratyn 3 esirtki zerthanasy joıyldy.Esirtki qoımasyn uıymdastyrýdyń 2 deregi jáne quramynda esirtkisi bar ósimdikterdi ósirýdiń 1 deregi anyqtaldy. Jalpy, Almaty polıtseıleri 60 keli esirtki tárkiledi», - dedi Saltanat Ázirbek.
Sondaı-aq spıker sıntetıkalyq esirtkini onlaın satý máselesine de toqtaldy.
«Bıyl polıtseıler 27 esirtki betbelgisin qoıýshyny ustady, esirtki taratatyn jáne jarnamalanatyn 73 ınternet-resýrs anyqtaldy. Sońǵylary týraly aqparatty odan ári buǵattaý úshin «Kıbernadzorǵa» jiberildi. «Narkostop» qozǵalysynyń eriktileriniń belsendi qatysýymen esirtkiniń taralýy týraly aqparatty qamtıtyn 1500 graffıtı jazýy tabyldy jáne boıaý arqyly joıyldy»,- dedi ol.
Polıtsııa ókili, esirtki quraldaryn, psıhotroptyq zattardy nemese sol tektesterdi, prekýrsorlardy zańsyz jarnamalaǵany úshin QK-tiń 299-baby 1-1-bóligimen 1 adam jaýapqa tartylǵanyn atap ótti.
«Almatyda jyl basynan beri 300-ge jýyq profılaktıkalyq is-shara júrgizildi. Narkolog-dárigerlermen birlese, aqparattyq jumys júrgizýge basa nazar aýdaryldy. Polıtsııa departamenti men Almaty qalalyq bilim basqarmasymen jalpy bilim beretin mektepter men kolledjderde taqyryptyq dárister, trenıngter, semınarlar ótkizý týraly memorandýmǵa qol qoıyldy»,- dedi Saltanat Ázirbek.