Almaty oqıǵasy: Shyǵynǵa ushyraǵan kásipkerlerge jeńildetilgen nesıe beriledi

ALMATY. QazAqparat - Almaty qalasynyń máslıhaty «Almaty Business-2025» óńirlik baǵdarlamasynyń qańtardaǵy tártipsizdikter kezinde zardap shekken bıznes sýbektileri úshin jańa nesıelik ónim engizý bóliginde ózgeristerdi bekitti, dep habarlaıdy QazAqparat tilshisi.

Jeńildikpen nesıe berý 12 aıǵa deıingi merzimge jyldyq 2%-ben 10 mln teńgege deıin aınalym qarajatyn tolyqtyrý úshin qarastyrylǵan. Qaryz kepilge nemese «Almaty» ÁKK» AQ ishinara kepildigimen beriledi.

Qarajat jergilikti bıýdjetten bólingen, baǵdarlama operatory «Almaty» MQU» JShS bolyp tabylady.

Kásipkerlerge ótinim berý úshin Almaty qalasy, Baızaqov kóshesi, 303 úı, 201 kabınet, Almaty MQU keńsesine habarlasý qajet. Anyqtama telefony 2810 (uıaly telefonnan tegin), [phone] (qalalyq nómirlerden).

Aıta keteıik, buryndary halyqtyń áleýmettik osal toptary sanatyndaǵy tulǵalarǵa jáne óndiristik parkterdiń rezıdentterine «Almaty Business-2025» baǵdarlamasy aıasynda jyldyq 2%-ben jeńildetilgen nesıege qarastyrylǵan bolatyn.

Sondaı-aq, Almatyda shyǵynǵa ushyraǵan bıznes sýbektileri kommýnaldyq shyǵyndardan 3 aıǵa, qalanyń kommýnaldyq menshigin jalǵa alýshylar 6 aıǵa jaldaý aqysynan bosatylǵan.

«Almaty Finance» JShS jáne «Almaty» MQU» JShS-ge negizgi qaryzdy óteý merzimi keıinge qaldyryldy. 180 kúnge deıingi merzimge nesıelik mindettemeler boıynsha aıyppuldar men ósimpuldar joıylǵan.