Almaty oblysynyń jastary latyn álipbıine kóshýdi qoldady

ASTANA. QazAqparat - Almaty oblysynyń belsendi jastary Jastarǵa qyzmet kórsetý ortalyǵynda  QR Parlament Májilis zalynda ótken jıyndy onlaın kórip, jan-jaqty talqylady. Jas kóshbasshylar  álipbıdiń  latyn tiline kóshý saıasatyn qoldadyǵ dep habarlaıdy oblystyq kommýnıkatsııalar qyzmeti.

«Parlament latyn alfavıtine kezeń-kezeńmen kóshýdiń mańyzdylyǵyn atap ótti. Osyndaı ózgerister mundaı bastamalarǵa ońdy pikirler qalyptastyrmaýy da múmkin. Buǵan sheteldik talaı mysaldardy aıtsaq bolady. Psıhologııalyq  turǵydan alatyn bolsaq,  ınnovatsııanyń qadamdyq ádisi eń tıimdi bolyp tabylady», - dedi Almaty oblysynyń jastar resýrstyq ortalyǵynyń psıhology Altyn Sadýova.

 «Usynylǵan álipbıdiń 25 tańbadan turatyny meni qýantady. Birinshiden, áripter sany qazirgi álipbıimizden az ári yńǵaıly. Ekinshiden, dıgraftardy qoldaný jaǵymdy jańalyq boldy», - dedi Tinfo saıtynyń avtory Talǵat Ablaev.

 «Qazaq tilin latyn jazýyna kóshirý máselesi - aımaqtyq jastar saıasatynyń basym baǵyttarynyń biri. Búgingi tańda  meken-jaıymyzǵa jastardan latyn alfavıtine kóshý týraly kóptegen suraqtar kelip túsýde. Osy sebepten sizderdi qaralyp otyrǵan máseleni talqylaý úshin uıymdastyrdyq. Parlamentte sarapshylar birqatar suraqtarǵa jaýap berdi. Sonymen qatar, biz aımaqtyń barlyq óńirlerinde osyndaı pikirtalastar ótkizýdi josparlap otyrmyz», - dedi oblystyq Jastarǵa qyzmet kórsetý ortalyǵynyń bólim basshysy Dáýren Qasenov.

Jıyn sońynda  tyńdaýshylar da óz pikirin bildirip,  25 áripten turatyn latyn tili birneshe parametrler boıynsha ońtaıly bolyp tabylatynyn sóz etti.