Almaty oblysynyń úzdik eki otbasyna bir mln teńgeden syıaqy berildi

TALDYQORǴAN. QazAqparat - «Mereıli otbasy» ulttyq konkýrsynyń Almaty oblysy boıynsha jeńimpazdary anyqtaldy. Kójekbaevtar men Jarasovtar áýleti jeńimpaz atanyp, otbasynyń árqaısysy 1 mln teńgeniń sertıfıkatyn, I dárejeli dıplom ıelendi. 105 jastaǵy qarııa Kúrishbek Kójekbaev pen Maqsymjan Jarasovqa marapattaryn oblys ákiminiń orynbasary Jaqsylyq Omar tabys etti, dep habarlaıdy QazAqparat tilshisi.

Jambyl aýdanynan kelgen Jarasovtar otbasy - «Jasyl el» memlekettik baǵdarlamasyn júzege asyrýǵa aýqymdy úles qosqan áýlet. Otaǵasy Maqsymjan Jarasov mıllıonnan astam aǵash otyrǵyzǵan. Memleket basshysynyń Jarlyǵymen «Qurmet» ordenin ıelenip, «Ekologııa salasynyń úzdigi» tósbelgisin alǵan. 8 balany aıaqtandyryp, odan 40 nemere, 21 shóbere súıdi.

Uıǵyr aýdanynyń turǵyndary,  Kójekbaevtar otbasynyń da úlgisi eren. Kúrishbek Kójekbaev - Uly Otan soǵysynyń ardageri, soǵystan keıin de eldiń áleýmettik-ekonomıkalyq damýyna zor úles qosty. Birneshe memlekettik nagradalarǵa ıe bolǵan, sonyń ishinde «Qurmet» ordeni de bar. Qazirgi kezde 105 jastaǵy ardager 4 baladan 25 nemere, 30 shóbere, 15 shópshek súıip otyr.

 

Endi Jarasov pen  Kójekbaevtardyń  áýleti elordada ótetin respýblıkalyq baıqaýda baq synap, oblystyń namysyn qorǵaıtyn bolady.

"Búgin óz máresine jetip otyrǵan «Mereıli otbasy» baıqaýynyń oblystyq kezeńi qutty bolsyn! Elbasymyz Nursultan Ábishuly Nazarbaevtyń bastamasymen qolǵa alynǵan baıqaýdyń maqsaty - otbasylyq qundylyqtardy nasıhattaý, tatý-tátti, tárbıeli shańyraq múshelerin kópshilikke tanystyrý. El ishinde aýyldastarynyń qurmetine bólengen, ardaqty, berekeli áýletter, ónegesi mol otbasylar barshylyq. Sondyqtan jyl ótken saıyn «Mereıli otbasy» baıqaýynyń máni artyp, qatysýshylar qatary ulǵaıyp keledi. Biz mereıli otbasylardy úlgi-ónege etý arqyly óskeleń urpaqty izgilikke tárbıeleımiz. Búgingi baıqaý jeńimpazdaryn shyn júrekten quttyqtaımyn!", - dedi J. Omar

 

Ekinshi oryndy Uıǵyr aýdanynyń turǵyndary Hamraevtar otbasy men taldyqorǵandyq Myrzataevtar jáne Eskeldi aýdanynan Taıjanovtar ıelenip, 300 myń teńgeniń sertıfıkatyn aldy. Úshinshi orynǵa laıyq dep tanylǵan alakóldik Qojabekovter otbasy, Eńbekshiqazaq aýdanynan Qartbaevtar jáne Qarasaı aýdanynan kelgen Janǵuttylar otbasyna III dárejeli dıplom men 250 myń teńgeniń sertıfıkaty berildi. Olar oblystyń saýda, shyǵarmashylyq, aýyl sharýashylyǵy, áskerı qyzmet salalarynda eńbek etip júrgen ónegeli otbasylar.

Baıqaýǵa qatysqan basqa 30 otbasyǵa oblys ákiminiń alǵys hattary men aqshalaı syılyqtary berildi.

Qatysýshylar men jeńimpazdar atynan sóz sóılegen  Kúrishbek ata Elbasynyń salıqaly saıasatyn júrgizýge árkim de atsalysý kerektigin, eń aldymen jas urpaq anasyn, úlkenderdi syılap, eńbekti súıip, bereke-birlikte ómir súrý kerektigin atap ótip, batasyn berdi.

Jalpy, baıqaýdyń alǵashqy kezeńinde Almaty oblysy boıynsha 290 otbasy qatyssa, solardyń 38-i qazylar alqasynyń joǵary baǵasyn alyp, oblystyq baıqaýǵa joldama aldy. Jyl otbasy ataǵyna kóp balaly otbasylar, eńbek áýletteri, shyǵarmashylyq otbasylar, dárigerler, muǵalimder jáne basqa da úlgili shańyraqtar úmitker boldy.