Almaty oblysynyń turǵyny medıtsına qyzmetkerlerine tegin qymyz taratýda

TALDYQORǴAN. QazAqparat - Taldyqorǵan qalasyna qarasty Ótenaı aýyldyq okrýginiń turǵyny Mıllıoner Qajykenuly medıtsına qyzmetkerlerine apta saıyn 10 lıtr qymyz tegin taratý naýqanyn qolǵa aldy, dep habarlaıdy QazAqparat tilshisi.

«Ata-babamyzdan kele jatqan ulttyq sýsynnyń adam aǵzasyna tıgizer paıdasy zor. Álemdi jaılaǵan pandemııany toqtatýdyń birden-bir joly - ár adamnyń densaýlyǵyn jaqsartyp, ımmýnıtetin kóterý. Sondyqtan dertke daýa, janǵa shıpa bolatyn emdik sýsyndy aýrýhanalarǵa tegin taratýdyń medıtsına salasy qyzmetkerleriniń densaýlyǵyn saqtap qalýda paıdasy zor»,- deıdi aýyl turǵyny Mıllıoner Qajykenuly.

Qazirgi tańda Ótenaı aýyldyq okrýginiń ákimdigi jáne oblystyq «Rýhanı jańǵyrý» jobalyq keńsesi bastamasymen «Jomart júrek» atty qaıyrymdylyq aktsııasy ótip jatyr.

Shara Elbasy Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń «Týǵan jer» arnaıy jobasy aıasynda aýyldyq okrýg sheńberinde uıymdastyrylýda.

«Aldaǵy ýaqytta qymyzben birge shubat sýsynyn da medıtsına qyzmetkerlerine tegin úlestirýge qolǵabys jasalady. Saýaby mol ıgilikti shara munymen shektelmek emes. Sýsyndy aýylymyzdyń erikti jastary men belsendi azamattary emhanalarǵa, jedel járdem qyzmetkerlerine tegin jetkizip beredi. Ózge de aýyl azamattaryn qaıyrymdylyq aktsııasyna atsalysýǵa shaqyramyz», – deıdi okrýg ákimi Jannur Ábishev.

Esterińizge sala keteıik, buǵan deıin Almaty oblysynda Mońǵolııadan kóship kelgen Mıllıoner Qajykenulynyń tórt túlikti tóldetip, mıllıoner atanyp otyrǵanyn jazǵan bolatynbyz.