Almaty oblysynyń turǵyny 360 teńgege avtokólik utyp aldy

ASTANA. QazAqparat -  QR Qarjy mınıstrliginiń Memlekettik kirister komıtetinde «Atameken» ulttyq kásipkerler palatasynyń qoldaýymen «Túbirtekti talap et - júldeni utyp al!» aktsııasynyń qorytyndy utysy ótkizildi, dep habarlaıdy QazAqparat.

Aktsııanyń bas júldesi - avtokólikti Almaty oblysy Іle aýdany Baıserke aýylynyń turǵyny Orynbala Kákenova jeńip aldy. Baqytty chektiń somasy - 360 teńge ǵana.

«Osy aktsııa azamattarǵa bir ýaqytta kásipkerlik sýbektileriniń salyqtyq zańnamasyn saqtaý boıynsha qoǵamdyq baqylaýǵa belsendi qatysýyna jáne baǵaly júldeler utyp alýyna múmkindik berdi», - dedi aktsııanyń utysyna arnalǵan saltanatty sharada Memlekettik kirister komıteti tóraǵasynyń orynbasary Arǵyn Qypshaqov.

Birinshi yntalandyrý syılyǵy - teledıdar Astana qalasynyń turǵyny Uldaı Ysqaqovaǵa berildi. Ekinshi yntalandyrý syılyǵy - planshetti Almaty qalasynyń turǵyny Aınur Ohanova ıelendi. 

«Eń belsendi salyq tóleýshi» nomınatsııasynda jeńimpaz retinde Túrkistan oblysynyń turǵyny Janar Qozǵambaevaǵa planshet berildi. Ol jyldyń basynan bastap, 91 myńnan asa chek jibergen.

Budan basqa, salyq tóleýshilerdiń baqylaý-kassalyq tártibin saqtaý boıynsha qoǵamdyq baqylaýdaǵy belsendi azamattyq ustanym úshin Almaty qalasynyń turǵyny -Anton Shınǵa alǵys jarııalandy, mobıldi telefon berildi.

Eske sala ketsek, aktsııa 21 mamyrynan 30 qarashasy aralyǵynda ótkizildi.  Aktsııanyń alty aıy ishinde 30 myń adamnan shamamen 2,3 mln chek qabyldandy. Chekterdiń basym bóligi Almaty qalasy men Túrkistan oblysynan jiberildi. Jalpy respýblıka boıynsha 300-ge jýyq júlde berildi.

Aıta keterligi, elimizde 9 aıda 1,2 mln jeke kásipker, 97,1 myń baqylaý-kassa mashınasy tirkelgen.