Almaty oblysynyń Sarqan aýdanynda 50 páterli turǵyn úı paıdalanýǵa berildi
«Nurly jer» baǵdarlamasy aıasynda salynǵan 5 qabatty 50 páterli turǵyn úıdiń kilti ıelerine tabys etildi. Memlekettik baǵdarlama aıasynda salynǵan jalgerlik úıdiń lentasyn aýdan ákimi Talǵat Qanatuly qıdy. Budan keıin, óńir basshysy júrek jardy lebizin bildirip, sarqandyqtarǵa páter kiltterin tabystap, qonys toılarymen quttyqtady.
Kópqabatty jańa turǵyn úıden ata-anasynyń qamqorlyǵynsyz qalǵan jetim balaǵa on páter, І, ІІ toptaǵy múgedek janǵa toǵyz, múgedek balany tárbıleýshi otbasyǵa on, kóp balaly januıaǵa altaý, tolyq emes otbasyǵa alty, zeınetkerge bireý, Aýǵan soǵysynyń ardagerine bireý, memlekettik jáne bıýdjettik qyzmetkerge altaý jáne turǵyn úıi avarııalyq jaǵdaıdaǵy otbasyǵa bir páter berildi.
«Men búgin baspana kiltin alyp, úlken qýanyshqa kenelip otyrmyn. Osy qýanyshty sátti kóp kúttim. 10 jylǵa jýyq jaldamaly úıde turyp keldim, balalaryma eshqandaı jaǵdaı bolmady. Endi jańa serpinmen, aq nıetpen kıeli shańyraǵymyzǵa kirip otyrmyn. Osyndaı qýanyshtyń sebepshisi bolǵan aýdan ákimi Talǵat Qaınarbekovke, ózgede azamattarǵa alǵysymdy aıtamyn», - dep aǵynan jaryldy jańa úıdiń ıesi kóp balaly ana Perızat Qudııarova.
Jańadan berilip jatqan turǵyn úı zaman talabyna saı jasaqtalyp, barlyq kommýnıkatsııalyq jelilerge qosylǵan. Sondaı-aq, balalar oınaıtyn alańqaımen qosa avtokólik turaǵy da qarastyrylǵan.
Aıta ketý kerek, 5 qabatty 50 páterli turǵyn úı jumysyna jalpy 505 mln. teńgeden asa qarajat bólingen.