Almaty oblysynyń Raıymbek aýdanynda 18 otbasyǵa demeýshiler úı syılady
Qýanyshy eselenip jatqan jannyń biri - Raıymbek aýdanynyń qaqpasy sanalatyn Saryjaz aýylyndaǵy Isaevtar áýleti. 7 bala tárbıelep otyrǵan kópbalaly otbasy Isaev Serik pen Jazyqbaeva Sholpanǵa alty bólmeli baspanany sol aýyldyń O.Ateev, T.Tólemisov, N.Chýbanov, B.Keıkeev, E.Júnisbekov, O.Ábdirazaqov, aǵaıyndy Ǵalym, Naryn syndy kásipker azamattary demeýshilik jasap, syıǵa tartty. Jomart jandar baspanadan bólek, turmystyq tehnıka, úı jıhazdarymen de qamtamasyz etti.
Aýdan ortalyǵy Narynqol aýylynda da 4 birdeı otbasy baspanamen qamtyldy. Atap aıtsaq, az qamtylǵan otbasy Ospanbaeva Álııa men Jetibaev Azamat GÝMM stroı servıs JShS dırektory Ertis Nesiphanulynyń demeýshiligimen, jalǵyz basty kópbalaly ana Kúlembekova Aıgúl «DSÝ-13» AQ dırektory Vladımır Mıhaılovıchtyń demeýshiligimen, jeti balanyń anasy, jalǵyzbasty ana Baqytgúl Baǵasharqyzy «FoodMS» JShS dırektory Seıtjan Qusaıynovtyń, az qamtylǵan otbasy, alty balanyń ata-anasy Mahat Tyshtybaev pen Dınara Myrzahanqyzynyń otbasy kásipker Janbolat Qarataıulynyń qoldaýymen baspanaly bolyp, shattyqqa bólendi.
Odan bólek Shalkóde, Qaqpaq, Jambyl, Tegistik, Súmbe aýyldyq okrýgterinen de kómekke muqtaj otbasylar baspanaly boldy. Raıymbek aýdanynyń ákimi Jolan Omarov, máslıhat hatshysy Erlan Qudabaev, aýdandyq aqsaqaldar alqasynyń tóraǵasy Bekbolat Birbaev baspana ıelerin arnaıy baryp, shańyraqtaryna shattyq tilep, quttyqtady. Demeýshiler qýanysh ıelerine baspana kiltterin óz qoldarymen tabystap, syı sııapattaryn kórsetti. Sondaı aq, ózge de demeýshiler úı jıhazdaryn, búldirshinderge arnalǵan kıim- keshek, oıynshyqtaryn syılap, kóńilderin marqaıtty.
Aıta keteıik, sońǵy eki aıdyń ishinde Almaty oblysynda 60-tan asa kópbalaly otbasy demeýshilerdiń kómegimen baspanaly boldy.