Almaty oblysynyń polıtseıleri jalǵa beriletin páterlerge tekseristi kúsheıtti
Buǵan deıin Almaty oblysy Polıtsııa departamentiniń bastyǵy Murat Urumhanov oblys ortalyǵyndaǵy Páter ıeleri kooperatıvteriniń ókilderimen kezdesip, qoǵamdyq tártipti saqtaýda birlesip qyzmet atqarýǵa shaqyrǵan edi.
PIK basshylarynyń habarlaýynsha, kópqabatty úılerdegi quqyqbuzýshylyqtar men tártipke baǵynbaýdyń kóbi ýaqytsha jalǵa beriletin páterlerde bolady. «Arnaıy is-shara barysynda tártip saqshylary PIK tóraǵalarymen birlesip, jalǵa beriletin páter ıelerimen túsindirý jumystaryn júrgizdi. Baspanany arendaǵa tapsyrý úshin qajetti qujattar toptamalaryn tekserdi. Sonymen qatar, jalǵa alýshylarǵa qoǵamdyq tártipti saqtaý qajettiligi týraly aıtýdy eskertti»,- dep málim etti Almaty oblysy PD baspasóz qyzmetinen.
Vedomstvo taratqan aqparatqa sáıkes, polıtseılerdiń bastamasymen oblysta «Kórshiler baqylaýy» baǵdarlamasy jumys jasaıdy. Qoǵamdyq oryndardaǵy tártipti saqtaý men quqyqbuzýshylyqtardyń aldyn alýǵa baǵyttalǵan baǵdarlama boıynsha polıtsııaǵa myńǵa jýyq qońyraý soǵylǵan.
Óz kezeginde tártip saqshylary kez kelgen tártip buzýshylyqqa beı-jaı qaramaýǵa jáne der kezinde tártip saqshylaryna berilgen aqparat túrli oqıǵalardyń aldyn alatynyn eskertedi.