Almaty oblysynyń polıtseıleri azamattardy qabyldaý formatyn ózgertti

TALDYQORǴAN. QazAqparat - Koronavırýs ınfektsııasynyń taralýyna qarsy sharalardyń tıimdiligin arttyrý maqsatynda Almaty oblysynyń polıtseıleri azamattardy qabyldaýdy ýaqytsha toqtatty, dep habarlaıdy QazAqparat tilshisi.

Vedomstvo baspasóz qyzmetiniń málimetinshe, buǵan deıin polıtsııa basshylyǵy jáne aýdandyq polıtsııa basqarmalarynyń basshylary barlyq qabyldaýlardy, kezdesýlerdi, áńgimelesýler men dıalogtardy «face to face» rejıminde júzege asyryp keldi. Elde jarııalanǵan tótenshe jaǵdaıǵa baılanysty mundaı format toqtatylady. Alaıda azamattardy qabyldaý tártibi týraly aldyn ala habarlanatyn bolady.

Aǵymdaǵy jyldyń 18 naýryzynan bastap oblystyq Polıtsııa departamentiniń bastyǵy Serik Kúdebaevtyń, onyń orynbasarlarynyń, sondaı-aq aýdandyq polıtsııa basqarmalary basshylarynyń azamattardy qabyldaýy «suraq-jaýap» rejıminde elektrondy formatta jalǵasady. Qyzyǵýshylyq tanytqan barlyq azamattar Almaty oblysy Polıtsııa departamentiniń basshylyǵyna «Elektrondyu úkimet» portaly arqyly nemese Facebook, Instagram, VKontakte áleýmettik jelilerindegi Almaty oblystyq Polıtsııa departamentiniń paraqshalary arqyly habarlasa alady.

Polıtsııa departamenti azamattardyń qaýipsizdigi men densaýlyǵyn saqtaý maqsatyndaǵy ýaqytsha ózgeristerge túsinistikpen qaraýdy suraıdy.