Almaty oblysynyń Panfılov aýdanynda 40 otbasy baspanaly boldy

TALDYQORǴAN.QazAqparat - Almaty oblysynda Otan qorǵaýshylar men Jeńis kúni merekesine oraı kópbalaly otbasylar men jaǵdaıy nashar januıalar qonys toıyn toılady. Búgin Jarkent qalasynda 40 arendalyq turǵyn úı paıdalanýǵa berildi, dep habarlaıdy QazAqparat tilshisi.

Panfılov aýdanynyń ákimi Temirlan Bektasov kópbalaly otbasylarǵa páter kiltin arnaıy tabystady. Qonys toıyn toılap jatqan otbasylardy quttyqtaǵan aýdan ákimi bıylǵy jyly taǵy 5 qabatty 240 páter salynatynyn jetkizdi. Sondaı-aq, jyl sońyna deıin jergilikti kásipkerlerdiń kómegimen taǵy kópbalaly on otbasyǵa úı salyp berýdi josparlap otyrǵandyqtaryn aıtty.

3 bólmeli páterdiń kiltin alǵan 7 balanyń anasy Jupar Úmbetova kóp jyldar boıy páter jaldap qınalǵanyn jetkizdi. Ramazan aıynyń qarsańynda baspanaly bolǵan ana aýdan, oblys ákimdigine alǵysyn bildirdi.

Búgin qonys toıyn toılaǵandardyń qatarynda Tatıana Kamýrovada bar. 7 balany jalǵyz asyrap, baspanasyz júrgen ana 6 jyldan beri osy kúndi kútkenin aıtyp, qýanyshtan kózine jas aldy.

Bir standartta salynǵan 70 sharshy metr 40 úıdiń qurylys jumysy 2017 jyly bastalǵan. Munda jeke qorajaı, arnaıy qoımasy men birge ár úıdiń syrty jeke-jeke qorshalǵan.

Aıta ketý kerek, jyl basynan beri kásipkerlerdiń qoldaýymen Panfılov aýdanynda 11 otbasy baspanaly boldy. Jalpy úı kezeginde 2648 januıa bolsa, sonyń ishinde 268-i kópbalaly otbasylar.