Almaty oblysynyń kásipkerleri «Ashyq»-pen jumys isteýge kiristi

TALDYQORǴAN. QazAqparat - Almaty oblysynda keıbir karantındik sharalar jeńildetildi. Oqýshy sany 300-den aspaıtyn qala jáne aýyl mektepterinde bilim berý dástúrli formatqa kóshti, dep habarlaıdy QazAqparat tilshisi.

Degenmen, synyptarda bala sany 25-ten aspaýy tıis. Sondaı-aq óńirde bastaýysh jáne mektep bitirýshi synyptar da oflaın oqý ádisine oraldy.

Budan bólek, búginnen bastap oblys kásipkerleri «Ashyq» biryńǵaı jobasynyń talaptarymen jumys isteýge kiristi. Qazirdiń ózinde Taldyqorǵan qalasynda 90-ǵa jýyq nysan tirkelip, halyqqa qyzmet kórsetýin bastap ketti. Olardyń qatarynda 80 qoǵamdyq tamataný orny, fıtnes ortalyqtary men eki kınoteatr bar. Óńir turǵyndary da jańa júıege beıimdelip, mobıldik qosymshany júktep, qajetti qyzmet túrlerin alýda.

«Óńir «qyzyl» aımaqta bolsa, osy joba boıynsha kásipkerlik nysan «sary» aımaqtyń talaptary boıynsha jumys isteıdi. Eger óńir «sary» aımaqta bolsa, onda kásipkerlik nysan «jasyl» aımaqtaǵy erejeler boıynsha jumys isteıdi«, - dedi Almaty oblystyq kásipkerler palatasynyń resmı ókili Dıas Beısenbek.