Almaty oblysynyń ákimi Uıǵyr aýdanyndaǵy sport kesheniniń qurylys barysymen tanysty
Osy saparynda salynyp jatqan sport kesheniniń qurylys jumystaryn baryp kórdi. Agroónerkásip kesheni nysandarynda bolyp, aýqymdy ınvestıtsııalyq jobalarmen tanysty, - dep habarlaıdy QazAqparat tilshisi Almaty oblysy ákiminiń baspasóz qyzmetine silteme jasap.
Máselen, aýdanda «Prıma Qus» JShS-nyń qus etin óndirip, óńdeıtin keshenin ashý josparlanyp otyr. Nysan bıylǵy jyldyń mamyr aıynda salyna bastaǵan, 2022 jyldyń qazanynda alǵashqy ónim shyǵaralady dep kútilýde. Eksportqa baǵyttalǵan kásiporyn úsh kezeńmen iske asyrylady. Oǵan barlyǵy 97 mlrd teńge ınvestıtsııa tartylyp, 1500-deı jumys ornyn ashý josparlanyp otyr.
I kezeńinde qurama jem zaýyty, 24 taýyq kúrke, ınkýbator, broıler semirtetin 2 alań salynady. Bul rette negizgi trassadan qus fabrıkasyna deıin jol tóseýge memleket qoldaýy qajet. Sol sııaqty jergilikti kadrlar daıarlaýda, ınkýbatsııalyq jumyrtqa óndirisin keńeıtý úshin qosymsha jer ýchaskesin bólýge de kómek kerek. Qanat Bozymbaev aıtylǵan osy máselelerdi zerttep qaraýdy tapsyrdy. Sonymen birge jergilikti turǵyndardan maman daıarlaý barysynda «Atameken» Óńirlik kásipkerler palatasynyń qoldaýymen «Eńbek» baǵdarlamasynyń múmkindikterin paıdalana otyryp uıymdastyrýdy usyndy.
Osy kúni oblys basshysy jumys istep turǵan «OTAN «Green Food» JShS-nyń «Aiser» qus fabrıkasyna da bardy. Bul nysan jylyna 30 myń tonna qus etin óndiredi. Ony iske qosý barysynda 20 mlrd. teńge ınvestıtsııa tartylǵan, 1200 jumys orny ashylǵan. Kásiporyn qus eti óndirisiniń tolyq tsıklyn qamtamasyz etip otyr. Ataı aıtqanda, munda ınkýbatsııa, broıler balapandaryn ósirý, qurama jem shyǵarý, óńdeý, saqtaý, naryqqa shyǵarý – bári-bári qamtylǵan.
Oblys ákimi aktsıonerlerge qus fabrıkasynyń qýatyn 50 myń tonnaǵa deıin arttyrýdy usyndy. Olardyń óz shıkizatynan soıa ósirip, qus azyǵyn óndirýge kerekti jer ýchaskesin bólý týraly ótinishterine qoldaý bildiretinin aıtty. Oblys basshysy jer telimin bólý máselesi sheshilgenshe kompanııa basshylyǵy óz tarapynan jobany daıyndaı berý kerektigin de jetkizdi.
Qanat Bozymbaev óńirdegi baq sharýashylyǵyna da nazar aýdardy. Baq ósirý – aýdannyń basymdyq berip otyrǵan baǵyttarynyń biri. «Shonjy Agro» JShS-nyń 500 ga jerinde órik pen qara óriktiń túrli sorttary, shıe men shabdaly ósiriledi. Baqtan 7 myń tonna ónim jınalady dep kútilip otyr. Kásiporyn dırektory Dilmurat Qaıyrbekov baq sýarýda sýdyń úzdiksiz jáne der kezinde berilýi mańyzdy ekenin aıtty. Ol úshin kóktemge deıin kanaldardy aǵymdaǵy jóndeýden ótkizý kerek. Bul rette Q.Bozymbaev qajetti kómek kórsetýdi aýdan ákimine tapsyrdy.
Oblys ákimi qurylysynda qıyndyqtar týyndaǵan dene shynyqtyrý-saýyqtyrý kesheniniń qurylysyn baryp kórdi. Shonjyda turǵyzylyp jatqan bul nysan merdiger uıym ókilderiniń aıtýynsha, aldaǵy jyldyń qazan aıynan keshiktirmeı qoldanysqa beriledi. Qanat Aldabergenuly bolashaqta mundaı jobalardy josparlaǵan kezde shyǵynyn azaıtyp, paıdaly alań kólemin arttyryp, sport nysandarynyń tıpti jobalaryn daıyndaý kerektigin eskertti.
Sapar barysynda Qanat Bozymbaev aýdan aktıvimen júzdesip, óńirdiń damý jaǵdaıy týraly máselelerdi birlesip talqylady. Aýdan ákimi Shýhrat Nýrahýnov atqarylǵan jumystar men aldaǵy josparlarǵa qysqasha toqtaldy. Sol sııaqty Almaty oblysynyń Qurmetti azamaty Yzǵarbek Bektursynov jáne basqa da azamattar aýdannyń aýyl sharýashylyq áleýetin tıimdi paıdalanýǵa qatysty oı-pikirlerimen bólisti.
Jıyn qorytyndysynda oblys ákimi eldi mekenderdi ortalyqtandyrylǵan aýyz sýmen qamtý, tozyǵy jetken aýyz sý júıelerin jańǵyrtý, azyq-túlik óndirisine ınvestıtsııa tartý, iri qara mal basynyń, sút óndirisiniń tómendeýine jol bermeý, jastardyń bos ýaqytyn tıimdi uıymdastyrý máselelerine qatysty tapsyrmalar berdi.
«Uıǵyr aýdany aýyl sharýashylyǵyna negizdelgen óńir. Sondyqtan agrarlyq salaǵa ınvestıtsııa tartý eń mańyzdy basymdyqtardyń biri bolýy kerek. Bul rette sýarý júıelerin jóndeý, sýarmaly jerlerdi aınalymǵa qosý jáne basqa da aýdan turǵyndary tarapynan búgingi aıtylǵan usynystardy eskerińizder. Qańtar aıynda osy aýdannyń problemalaryn, ony sheshý baǵyttaryn oblys ákimdiginiń otyrysynda talqylaıtyn bolamyz. Qandaı resýrstar kerek, qansha qarjyny talap etedi, qansha ýaqytta iske asyrylady - sonyń bárin birlesip anyqtaımyz», - dedi Qanat Bozymbaev.