Almaty oblysyndaǵy Tekeli qalasyna gaz keldi
Qazirgi kezde qalanyń ishki kóshelerine jáne jaqyn jatqan eldi mekenderge gaz qubyryn tartý jumystary júrip jatyr. Osy jumystardyń barysymen oblys ákiminiń orynbasary Aıdarbek Baıjanov tanysyp qaıtty.
Ol Tekeli qalasynyń batys jaq shetinde ornalasqan jergilikti AGTS-ta boldy. Oblys ákiminiń orynbasaryna atqarylǵan jumystar týraly «AqnıetGrýpp» JShS joba basshysy Aleksandr Petlın baıandap berdi. Bul kompanııa - gaz qubyry men oǵan tıesili ınfraqurylymdardyń qurylysyna jaýapty merdiger mekeme. Jobanyń quny bir jarym mıllıard teńgege jýyqtaıdy. Tekeli gaz qubyry qurylysy kezinde qalaǵa jaqyn ornalasqan Shymyr, Baıysov, Eshkiólmes, Abaı, Órqýsaq, Jetisý, Ekpindi, Syrymbet aýyldaryna da qubyr tartyldy. Qurylys jumystary ótken jyldyń qazan aıynda bastalǵan bolatyn. Paıdalanýǵa berý merzimi bıylǵy jyldyń qazan aıyna belgilengenimen, jumys merzimnen úsh aı buryn aıaqtaldy. Qubyr tolyq iske qosýǵa daıyn. Magıstral boıynsha gaz berýdiń josparly qýaty - saǵatyna 43,7 myń tekshe metr. Bul Tekeli qalasynyń turǵyn úıleri men óndiristerin kógildir otynmen qamtamasyz etýge tolyq jetkilikti.
Merdiger kompanııanyń jumysyn oń baǵalaǵan Aıdarbek Baıjanov munan soń qaladaǵy ishki gaz tartý jumystarymen tanysty. Seıfýllın kóshesine alǵashqy gaz jelisi júrgizilip úlgergen. Jergilikti kommýnaldyq sala brıgadasy osy kóshedegi alǵashqy abonentterdi 30 tamyz kúni qosýǵa daıyndap jatyr.
Osy kúni oblys ákiminiń orynbasary oblys ortalyǵyn gazdandyrý boıynsha jınalys ótkizip, Taldyqorǵan qalasynyń ishki kóshelerine gaz qubyryn tartý jumystarynyń baıaýlyǵyn synǵa aldy. Tórt kezeńge bólingen gazdandyrýdyń ekinshi kezeńi aıaqtaldy dep eseptelgenimen, áli de bitpegen jumystar barshylyq. Kósheler qazylyp tastalǵan, jumystyń baıaý júrip jatqanyna qalalyqtar narazy jáne olardyń syny ádiletti dep atap ótken A. Baıjanov tıisti mekemelerge kemshilikterdi joıyp, jumysty sapaly atqarýdy tapsyrdy