Almaty oblysyndaǵy saıajaılarǵa eldi meken ataýy berile bastaıdy
Almaty oblysynda saıajaılyq birlestikter men baý-baqsha seriktestikterine eldi meken statýsyn beretin mehanızm iske qosylyp, Almaty aımaǵynda turatyn 183 myńnan astam adamnyń asa ózekti máselesiniń sheshilýine septigin tıgizedi. Oblys boıynsha barlyǵy 705 saıajaılyq alqap bar. Sondyqtan saıajaı máselesi kún ótken saıyn ózekti bola túsýde. Ony tıimdi jolmen sheshý 135 saıajaıy bar Eńbekshiqazaq aýdany úshin de mańyzdy.
Osy aýdannyń turǵyndary qoıǵan saýaldarǵa jaýap bergen Almaty oblysynyń ákimi Qanat Bozymbaev saıajaıdaǵy ınfraqurylym máselesin sheshý úshin aldymen oǵan eldi meken statýsyn berý kerektigin atap ótti. Demek, sonda ǵana mektep, balabaqsha, aýrýhana, jol men kóshelerdi jaryqtandyrý, ortalyqtandyrylǵan aýyzsý men tabıǵı gaz tartý máselesi sheshiledi. Óıtkeni, qazaqstandyq zańnamaǵa sáıkes jergilikti atqarýshy bılik bıýdjet qarjysyn aýyldyq jáne qalalyq aýmaqtardy damytýǵa ǵana jumsaı alady. Saıajaı kooperatıvteri budan syrt qalady.
«Osy máseleni men el Prezıdentine, úkimet basshysyna jetkizdim. Soǵan saı qajetti qoldaý men maquldaý aldyq. Qazir árbir aýdanǵa bas jospardy túzetý men tolyq josparlaýdyń jobasyn jasaý úshin shamamen 500-700 mıllıon teńge kóleminde qarjy bólip otyrmyz. Osyǵan oraı bas josparlardy pysyqtaý jónindegi aýyr jumystardy bıyl aıaqtaımyz dep oılaımyn. Keler jyly egjeı-tegjeıli josparlaý jobalarymen aınalysamyz. Odan soń respýblıkalyq bıýdjetten qarjy alý úshin ótinish berip, jetispegenin jergilikti bıýdjetten bóldiremiz. Sonyń arqasynda 2-3 jyldyń kóleminde saıajaılar eldi meken statýsyn alady. Bul másele osy ýaqqa deıin múlde sheshilmegenin eskersek, mejelengen merzimge shydaýǵa bolady», – dedi oblys ákimi Qanat Bozymbaev.
Eńbekshiqazaq aýdanynyń turǵyndary naqtylaý maqsatyndaǵy saýaldardy kóp qoıǵan kezdesýde «Shubar», «Mereke», 14-shi saıajaı sııaqty saıajaılyq birlestikterdiń turǵyndary belsendilik tanytty. Buǵan deıin belgisiz bolyp kelgen máseleniń túıini sheshiletinin uǵynǵan saıajaılyq turǵyndar jaqyn arada órkenıettiń qarapaıym qajettilikterine qol jetetinine senim bildirdi.