Almaty oblysyndaǵy plantatsııadan 10 tonnadan astam qarasora tárkilendi

ASTANA. QazAqparat – Іshki ister mınıstrligi men Ulttyq qaýipsizdik komıtetiniń birlesken operatsııasy arqyly Almaty oblysynda egilgen qarasora plantatsııa joıyldy. Bul týraly Іshki ister mınıstrliginde ótken brıfıngide vedomstvonyń ókili Shuǵyla Turlybek aıtty, dep habarlaıdy QazAqparat tilshisi.

«Almaty oblysynyń Balqash aýdanynda dron kómegimen quramynda esirtki bar qarasora egilgen plantatsııa anyqtaldy. Almaty qalasynyń turǵyny shalǵaıdaǵy bir gektar jerde «úndi» qarasorasyn ósirgeni belgili boldy. Plantatsııany tapqannan keıin polıtseıler birden 5 tonnadan astam qarasoranyń kózin joıdy. Qalǵan ósimdikti joıý birneshe kúnge sozyldy. Nátıjesinde jalpy salmaǵy 10 tonnadan astam qarasora otaldy», - dedi Shuǵyla Turlybek.

Mınıstrlikten málimdegendeı, bul qylmysqa qatysy bar kúdikti ustalǵan.

«Oǵan qatysty Qylmystyq kodekstiń 300-babynyń 2-bóligi boıynsha qylmystyq is qozǵaldy. Jaza 8 jylǵa deıin bas bostandyǵynan aıyrýdy kózdeıdi. Osy fakti boıynsha tergeý jalǵasyp jatyr», - dep toqtaldy Shuǵyla Turlybek.