Almaty oblysyndaǵy eldi mekenderdiń 87 paıyzyna aýyz sý tartylǵan

TALDYQORǴAN.QazAqparat - Almaty oblysyndaǵy 741 eldi mekenniń 647-si ortalyq sýmen jabdyqtalǵan. Jyl sońyna deıin taǵy 17 aýyl sapaly aýyzsýǵa qol jetkizip, qamtý deńgeıi 89,6%-ke jetedi, dep habarlaıdy QazAqparat tilshisi.

Almaty oblysynyń ákimi Amandyq Batalov Joldaýdy talqylaýǵa arnalǵan jıyn barysynda bul respýblıkadaǵy eń úzdik kórsetkish ekenin atap ótti. Sondaı-aq, óńir basshysy jergilikti mańyzy bar joldardyń qurylysy men jóndeýge jyl saıyn 30 mlrd. teńgege deıin qarjy bólinetinin jetkizdi.

«Biz bul jumysty jalǵastyramyz. Sonymen qatar, Joldaýdyń aıasynda árbir óńir men iri qalanyń básekege qabilettiliktiń qolda bar basymdyqtaryn eskerip, ózindik ornyqty ekonomıkalyq ósý jáne jumyspen qamtý modeline súıenip, elimizde aýmaqtyq damytýdyń jańa tásilderin engizý kózdelýde. Bul aspektilerdiń barlyǵy Óńirlerdi 2025 jylǵa deıin damytýdyń jańa baǵdarlamasynda eskeriletin bolady, «Nurly jol» jáne «Nurly jer» baǵdarlamalaryn iske asyrý merzimi 2025 jylǵa deıin uzartylady», - deı kele Amandyq Batalov qaramaǵyndaǵylarǵa naqty tapsyrma berdi.

Osy máselege oraı oblys ákiminiń orynbasarlary Lıazzat Turlashovqa, Aıdarbek Baıjanovqa eldi mekenniń perspektıvalyq damý josparlaryn eskere otyryp, qosymsha ınfraqurylymdyq jobalar tizbesin qurýdy, sondaı-aq bul sektorǵa jeke ınvestorlardy tartý úshin jaǵdaı jasaýdy tapsyrdy.

Aıta keteıik, 5 qazan kúni QR Prezıdenti Nursultan Nazarbaev Qazaqstan halqyna bıylǵy Joldaýyn jarııalaǵan bolatyn.