Almaty oblysynda jýrnalıster IIDB aıasynda ashylǵan birqatar kásiporyndardyń jumysymen tanysty

ASTANA. QazAqparat - Respýblıkalyq jáne jergilikti BAQ ókilderi Almaty oblysy ákiminiń baspasóz qyzmeti uıymdastyrǵan press-týr barysynda Indýstrıaldy-ınnovatsııalyq damý baǵdarlamasynyń aıasynda ashylǵan jáne jeke ınvestıtsııa negizinde jumys jasap otyrǵan Іle aýdanyndaǵy birqatar kásiporyndardyń jumysymen tanysty, dep habarlady Almaty oblysy ákiminiń baspasóz qyzmetinen.

Іle aýdany Aşybulaq aýyldyq okrýgi ákiminiń orynbasary Kenje Muralımovanyń aıtýynsha, jalpy aýdanda Indýstrııalandyrý kartasy sheńberinde iske qosylǵan 13 nysan jumys isteıdi.

Sonyń ishinde eń irileri - «Aluminium of Kazakhstan» zaýyty, «Birinshi syra zaýyty» JShS jáne «Abdı Global Farm».
Bular jalpy sany 500 adamdy turaqty jumyspen qamtyp otyrsa, aldaǵy ýaqytta bul kórsetkishti áli de ulǵaıtatyn bolady. Ákim orynbasarynyń sózine súıensek, memleket qoldaýynyń nátıjesinde atalǵan kásiporyndar qajetti ınfraqurylymdarmen qamtamasyz etilgen. Sonymen qatar, qazirgi kezde aýdanda jańa iri kásiporyndar salý jumystary qarqyndy júrgizilýde.

Jýrnalıster aldymen «Aluminium of Kazakhstan» alıýmınıı profılderin óndiretin zaýytta boldy. Indýstrıaldy-ınnovatsııalyq damý baǵdarlamasynyń aıasynda iske qosylǵan kásiporyn alıýmınıı profılderiniń 1500-nan astam túrin shyǵarady. Jylyna 1000 tonna daıyn ónim óndiredi. Qazirgi kezde shyǵarylǵan ónim Qazaqstannyń barlyq aımaqtaryna jóneltilýde, aldaǵy ýaqytta Eýropa men Reseıge eksporttaý josparlanyp otyr.

Zaýytta jas mamandar óte kóp ekenin atap ótý kerek. Solardyń biri elektrık mamandyǵyn alǵan Nurlan zaýyt alǵash ashylǵan sátten beri 1 jarym jyl kóleminde jumys istep júr. Ol elektrmen jumys isteýdi zaýytta 2 aı ishinde meńgerip aldy. 20 jasar jigit zamanaýı qurylǵylardyń arqasynda kásiporyndaǵy jumystyń deni avtomattandyrylǵanyn, bul jumysty edáýir jeńildip otyrǵanyn alǵa tartty.
Oraýshy bolyp jumys isteıtin Balaýsa Qudaıbergenova zaýytta on bir aıdan beri jumys isteıdi. Ol aýyldyq jerde osyndaı irgeli zaýyttyń ashylǵanynyń nátıjesinde ózi sekildi birneshe aýyldasy zaýytqa jumysqa kirgenin aıtty.

- Bizde zaýytta jas mamandar óte kóp. Elimizde eńbek etkisi kelgen árbir adam eki qolǵa bir jumys taba alady. Eń bastysy - talap pen talpynys bolsa jetkilikti, oǵan qosa qalaǵan ýaqytta biliktiligińdi aýystyrýǵa múmkindigiń bar. Bul qazir basqa kásiporyndarmen qatar bizdiń zaýytta da qoldanyla bastady, - deıdi B. Qudaıbergenova.

Munan soń tilshiler «Birinshi syra zaýyty» JShS jumysymen tanysty. Zaýyt dırektory Aleksandr Olovıagınniń sózine súıensek, zaýyt 2007 jyldan beri jumys isteıdi. Kásipkerdiń jeke ınvestıtsııasyn salýy negizinde jumys istep turǵan kásiporyn germanııalyq qural-jabdyqtarmen jabdyqtalǵan. Aldaǵy ýaqytta túrli tátti shyryndar shyǵarýdy, soǵan oraı qosymsha jańa jumys oryndaryn ashýdy josparlap otyr.

Bul jerde de jas mamandar Qanat Jamatdınov pen Aıgerim Aqjigitova tilshilermen pikir bólisti. Qanat zaýytta 3 jyldan beri operator qyzmetin atqarsa, Aıgerim - ınjener-hımık. Olarǵa tájirıbeli mamandar óz bilgenderin jalyqpaı úıretip, maman retinde shyńdalýyna septesse, zaýyt tarapynan jumysqa qajetti qolaıly jaǵdaılardyń barlyǵy jasalǵan.. Jas mamandar kásiporynnyń irgesi keńeıtilip, kúni erteń aýyldyq eldi meken turǵyndaryna jańa jumys oryndaryn usynatynyna senim bildirdi.