Almaty oblysynda jeltoqsanda 36 nysan iske qosylady

TALDYQORǴAN. QazAqparat – Almaty oblysynda Tuńǵysh Prezıdent kúni men Táýelsizdik merekesine oraı jańadan 36 nysan ashylatyny josparlanǵan. Nátıjesinde 400-ge jýyq jumys orny qurylady, dep habarlaıdy QazAqparat tilshisi.

Atalǵan 36 nysannyń 12-si 1 jeltoqsan, al qalǵany 16 jeltoqsan merekesine oraı esigin aıqara ashpaq. Olardyń qatarynda medıtsına, bilim berý, mádenıet, aýyl sharýashylyǵy, ónerkásip salalarynyń nysandary men turǵyn úıler bar.

Atap aıtqanda, 1 jeltoqsan qarsańynda Kerbulaq aýdanynda jalǵa beriletin turǵyn úıler, Jambyl aýdany Tarǵap aýylynda, Uıǵyr aýdanynyń Qaljat aýylynda dárigerlik ambýlatorııalar, Іle aýdanynda 3 birdeı balabaqsha iske qosylyp, el ıigiligine usynylmaq.

Sondaı-aq Qarasaı aýdany Kókózek aýylynda ornalasqan sendvıch-panelder men pishindi tósenishter shyǵaratyn «Bolashaq Qaz-Metall» zaýyty óz jumysyn bastaýǵa daıyn. Nysannyń jobalyq quny – 110 mln teńge.

Al Kóksý aýdanynda «Sultan» sharýa qojalyǵynyń 200 basqa arnalǵan mal bordaqylaý alańy, «Nurlan» sharýa qojalyǵynyń bazasynda ashylatyn 200 basqa arnalǵan sút-taýarly fermasy, Sarqan qalasyndaǵy «Jolbosynov» JK-nyń 150 basqa laıyqtalǵan mal bordaqylaý alańy agrarlyq saladaǵy mindetterdiń oblysta tabysty oryndalýyna úles qospaq. Uıǵyr aýdany Dardamty aýylynda «Eko product Plus» JShS 1 gektar jerge qýaty jylyna 100 tonnalyq jylyjaı keshenin qolǵa alýda. Qaratal aýdany Aıtýbı aýylynda «AgroInvestQaratal» JShS-nyń 340 basqa arnalǵan shoshqa ustaý kesheni de jańa jobalar qatarynda.