Almaty oblysynda jastarǵa arnalǵan ıpotekalyq turǵyn úı baǵdarlamasy bastalady

QONAEV. QazAqparat - Almaty oblysynyń ákimdigi men «Otbasy bank» AQ («Báıterek» holdınginiń enshiles uıymy) jańa turǵyn úı baǵdarlamasyn bastady. Joba 35 jasqa deıingi oblys turǵyndaryna jeke baspana satyp alý úshin jeńildetilgen nesıe alýǵa múmkindik beredi, dep habarlaıdy QazAqparat.

«Alataý jastary» baǵdarlamasynyń sharttary boıynsha qatysýshylardyń Almaty oblysyndaǵy resmı jumys ótili bir jyldan kem bolmaýy tıis. Ony mindetti túrde zeınetaqy jarnalarynyń turaqty túsimi kórsetilgen qujatpen rastaý qajet.

Sondaı-aq ótinish berýshiniń Almaty oblysynda keminde bir jyldyq merzimi bar turaqty tirkeýi bolýy kerek. Taǵy bir shart – baǵdarlamaǵa qatysýshynyń jáne onyń otbasy músheleriniń sońǵy 5 jylda attaryna tirkelgen jyljymaıtyn múlik bolmaýy tıis.

Búgin Almaty oblysy ákiminiń orynbasary Lázzat Turlashov pen «Otbasy banktiń» óńirdegi fılıal dırektory Ǵalymjan Shalǵymbaev «Alataý jastary» baǵdarlamasyn bastaý týraly kelisimge qol qoıdy.

«Almaty oblysy osyndaı baǵdarlamalardy bizden buryn iske asyrǵan Almaty, Astana, Qaraǵandy, Jambyl jáne Qostanaı oblystarynyń ońtaıly tájirıbesin úlgi retinde aldy... Birinshi kezeńde oblys ákimdigi jańa jobaǵa 600 mln teńge bólip otyr. Al Otbasy bank óz kezeginde bul qarajatqa jeńildetilgen nesıe berýge kómektesedi. Osyndaı qoldaýdyń arqasynda oblys turǵyndary bıyldyń ózinde alǵashqy qonys toıyn toılaıtyn bolady», - dedi Ǵalymjan Shalǵymbaev.

Baǵdarlamaǵa qatysýǵa ótinimder 2022 jyldyń 1 qarashasynan bastap, bir aı boıy qabyldanady. Ótinimdi oblys ákimdiginiń Іshki saıasat basqarmasyna berý qajet.

Qujattardy qabyldaý aıaqtalǵannan keıin ákimdikten arnaıy qurylǵan komıssııa jınalǵan upaılar boıynsha irikteý ótkizedi. Onyń barysynda nekede bolǵan jyldar sany, balalarynyń bolýy, jumys tájirıbesi, mamandyǵy jáne qyzmet salasy negizge alynady.

Keıin qatysýshylardyń tizimi jasalyp, Otbasy bankine jiberiledi. Qatysýshylar bankte tólem qabilettiligin baǵalatyp, óz betimen baspana tabady. Ony satyp alýǵa bank 10 mln teńge nesıe beredi. Eger múliktiń quny 10 mln teńgeden asatyn bolsa, úmitker aıyrmashylyqty óz qarajaty esebinen tóleı alady.

Eger otbasy jańa turǵyn úı (paıdalanýǵa berilgen bolýy tıis) satyp alsa, onda alǵashqy jarna 0% bolady. Eger ekinshi naryqtan alynǵan baspana bolsa (páter nemese jeke úı), onda alǵashqy jarna 10% quraıtyn bolady.

Nesıe boıynsha syıaqy mólsherlemesi jyldyq 5% teń (JTSM 5,2%). Nesıeniń maksımaldy merzimi – 19 jyl.