Almaty oblysynda zańsyz jerdi ıelenýge qatysty 20 oqıǵa anyqtaldy

ASTANA. QazAqparat - Almaty oblysynda óz betinshe jer telimderin ıelenip alýǵa qatysty 20 derek tirkeldi. Bul jaıly Óńirlik kommýnıkatsııalar qyzmetinde ótken brıfıngte Oblystaǵy jerdiń paıdalanylýy men qorǵalýyn baqylaý basqarmasynyń basshysy Asqar Joldoǵytov málimdedi.

Onyń aıtýynsha, Memleket basshysynyń tapsyrmasyn oryndaý barysynda basqarma memlekettik menshikti qaıtarý jáne ıgerilmegen jerlerdi aýylsharýashylyq maqsatynda paıdalanýǵa tartý isine basa nazar aýdarady.

Almaty oblysy kommýnıkatsııalar qyzmetiniń málimetinshe, júrgizilgen tekserý nátıjesinde 2015-2016 jyldary oblysta 331,2 myń ga jerdiń paıdalanylmaǵandyǵy anyqtaldy. Alaıda, tıisti sharalar da qoldanyldy: 40,2 myń ga jer memleket menshigine qaıtaryldy; 202,5 myń ga jer ıgerilýge berildi; 13,4 myń ga jer ıesiz múlik retinde esepke tirkelgen.

«Birinshi jarty jyldyqta Almaty oblysynda 20 jer ýchaskelerin óz betimen ıelený deregi tirkelgen, bul jerlerdiń jalpy aýmaǵy 143,6 gektardy quraıdy. Atalǵan quqyq buzýshylyqtar boıynsha ákimshilik sharalar qoldanylyp, 5 785 950 teńge kólemindegi aıyppul salyndy jáne azamattardyń óz erkimen ıelenip alǵan jerlerdiń qaıtarylýy basqarmanyń qatań baqylaýyna alyndy», - deıdi Asqar Joldoǵytov.