Almaty oblysynda uıǵyr, nemis, káris, orys ultynyń balalaryn baýyryna basqan otbasy turady

TALDYQORǴAN. QazAqparat - Almaty oblysynda Qoıbaǵarovtar januıasy — 14 bala ósirip jetkizgen otbasy. Óziniń 7 balasymen birge qazaq, uıǵyr, nemis, káris, orys ulty ókilderiniń balalaryn baýyryna basqan Sábıt Qoıbaǵarovty óńirde erekshe qurmetteıdi, - dep habarlaıdy QazAqparat tilshisi.

Panfılov aýdandyq ákimdiginiń bergen málimeti boıynsha, Sábıt Qoıbaǵarovtyń ózi de kóp balaly otbasynda ósken. Búginde jubaıy Amanhan Baıbýraeva ekeýi 14 balany er jetkizip, nemere súıip otyr. Qazir úlken balalary medıtsına salasynda, mal sharýashylynda eńbek etýde. Ákeleriniń isin jalǵastyryp, mal ósirip, qymyz, et satýmen aınalysady. Osy shańyraqtan meıirim tapqan balalardyń aldy 27-ge tolsa, arty 21 jasta.

Júregi keń azamat balalardy alalamaı, barlyǵyna birdeı qaraýdy jáne aqylmen tárbıeleý qasıetin óz ákesinen sińirgenin aıtady. «Bala kúnimde ákemmen egistik basynda júrgende balalar úıiniń balalaryn kórdim. Sonda ákem árdaıym múndaı balalarǵa qamqor bolý kerektigin aıtatyn. Sol aqyly kúni búginge deıin jadymda. Eń alǵash 2009-shy jyly káris ultynyń balasyn asyrap aldym. Óz balamdaı kórip, tárbıelep, barlyǵyn úırettim. Qazir Almatyda eńbekke aralasty. Negizinen jumystyń qyr-syryn úıretip, jaqsy tárbıeleseń ózderi ómir súrip ketedi. Keıin, nemis, uıǵyr, orys, qazaq balalaryn baýyryma bastym. Óz balalarymmen birge turyp, birge eńbek etýde. Úl-uyzdarymdy qazaqy dástúrge saı tárbıeledim. Eń birinshi osy balalarǵa qarap ózińdi tárbıeleıdi ekensiń. Sodan keıin balalardy tárbıeleısiń», - deıdi qaıyrymdy azamat S.Qoıbaǵarov.

Bul otbasynyń kórshileri peıili darhan otbasy ómirdiń qıyn jaǵdaıynda qalǵan azamattarǵa qol ushyn sozyp, úılerine panalatyp, jaǵdaıyn túzeýge qoldan kelgen kómegin berip, qatarǵa qosyp jibergen sátterdiń kóp bolǵanyn aıtady.

Sábıt Qoıbaǵarov temirden túıin túıetin ustalyqqa da úıir. Aýlasyna temirden túrli buıym, músinder, turmysqa qajetti dúnıeler jasap qoıǵan. Tipti otbasylyq shaǵyn murajaılary da bar.

«Iá, biz ártúrlimiz, ár ulttyń óz ereksheligi bar, biraq biz bir shańyraq astynda ortaq Otanymyz - táýelsiz Qazaqstanda ómir súrip kelemiz. Sondyqtan bizdiń tilek-maqsatymyz bir dep bilemin. Barsha halyqty birlik merekesimen quttyqtaımyn. Ár shańyraqta shattyq, molshylyq, bereke bolsyn», - dedi S.Qoıbaǵarov óziniń izgi tilegin jetkizip.

Panfılov aýdandyq ákimdiginiń habarlaýynsha, Qoıbaǵarovtar otbasy - óńirdegi úlgili shańyraq. Mal sharýashylyǵynyń damýyna atsalysyp, qaıyrymdylyq sharalarymen de belsendi aınalysady. Іndet órshigen shaqta beıjaı qalmaı, jerlesteriniń densaýlyǵyn nyǵaıtýǵa yqpal etý maqsatynda qymyzdy tegin taratypty.