Almaty oblysynda Ulttyq ulan sarbazy jarylystyń aldyn aldy

NUR-SULTAN. QazAqparat – Qoǵamdyq tamaqtaný ornynan qoıý tútin býdaqtap jatqanyn baıqaǵan áskerı qyzmetshi jarylystyń aldyn alý úshin gaz balondary men tez tutanatyn zattardy syrtqa shyǵaryp, órt sóndirýshiler kelgenshe jalynmen jalǵyz kúresti, dep habarlaıdy QazAqparat vedomstvonyń baspasóz qyzmetine silteme jasap.

Oqıǵa 13 tamyzda Almaty oblysyndaǵy Qarakemer aýylynan birneshe shaqyrym jerde bolǵan. Alaıda, áskerı qyzmetshiniń bul erligi jýyrda ǵana kafe ıeleriniń atynan bólimge jetken alǵys hat arqyly aıan etiledi.

Ulttyq ulannyń 6654 áskerı bóliminiń qyzmetshisi, podpolkovnık Baqyt Tashkenbaev otbasymen Esik eldi mekenine bara jatqanda jol boıyndaǵy kafeden shyqqan qalyń tútindi baıqaıdy. Ofıtser toqtaı qalyp, birden kómekke júgiredi.

«Kafede tek áıel adamdar ǵana boldy. Eń aldymen, tútindep jatqan as úıge júgirdim. Eki gaz balonyn dalaǵa shyǵardym. Osydan keıin áıelder órt ekinshi qabatqa ótedi dep aıqaılady. Saltanat zaly eken. Jıhazdy shyǵardym, ǵımarattyń tóbesine ottyń ótýine jol bermeý úshin perdelerdi julyp ala bastadym», - deıdi Baqyt Tashkenbaev.

Ulttyq ulannyń áskerı qyzmetshisi qutqarýshylar jetkenge deıin órtti alǵashqy sóndirý quraldarymen óz betinshe óshirip, evakýatsııalyq ótkelderdi bógde zattardan bosatady. Órt sóndirý komandasy jetkennen keıin de batyldyǵy men kásibıligin kórsetip, kómegin jalǵastyrady.

Foto: t.me/POLICE_of_KZ