Almaty oblysynda ýaqytynda paıdalanýǵa berilmegen nysandar anyqtaldy

QONAEV. QazAqparat - Almaty oblysynda antıkor qyrýar qarjy jumsalyp, ýaqytynda paıdalanýǵa berilmegen nysandardy anyqtady, - dep habarlaıdy QazAqparat tilshisi.

Máselen, Eńbekshiqazaq aýdanynyń aktıvimen kezdesý barysynda Almaty oblysynyń Sybaılas jemqorlyqqa qarsy qyzmeti basshysynyń birinshi orynbasary Nursultan Bekenov aýdannyń áleýmettik jáne ınfraqurylymdyq obektilerin salýdyń basty problemalarynyń biri – sýmen jabdyqtaý júıelerin qaıta qurý jáne salý ekenin aıtty.

Onyń aıtýynsha, 2020 jyly Eńbekshiqazaq aýdany ákimdiginiń bólimi «Sapa Qurylys 2007» JShS-men 3,8 mlrd teńge somasyna Eńbekshiqazaq toptyq sý qubyryn rekonstrýktsııalaý jáne salý jónindegi jumystardy oryndaýǵa shart jasalǵan. Ol boıynsha 2022 jyly aýdannyń 9 eldi mekeniniń, onyń ishinde Esik qalasynyń 105 myń turǵynyn sýmen qamtamasyz etedi dep boljanǵan bolatyn.
Bul rette, kórsetilgen somadan basqa ákimdik qosymsha 800 mln teńgege jýyq qarajat qosymsha bóldi.
Aldyn ala aqparat boıynsha aqsha jetkizýshige aýdaryldy, alaıda osy ýaqytqa deıin bul nysannyń qurylysy aıaqtalǵan joq (aıaqtalý merzimi – 2022 jyl).
Sonymen qatar, Aşysaı aýylynda 4 jyldan astam ýaqyt boıy turǵyndar aýyz sýǵa qol jetkize almaı keledi.
2018 jyly «Báıterek-Qurylys» JShS-men 305 mln teńgege aýyldy sýmen jabdyqtaý júıelerin rekonstrýktsııalaýǵa jáne salýǵa shart jasaldy.
Bul rette, búgingi kúnge deıin sý joq, jumys júrgizilmegen (24 km-den 19 km ǵana aıaqtaldy). Oryndalmaǵan jumys somasy 115 mln teńgeni quraıdy.
Departament bul máselelerdi baqylaýǵa aldy, tekserý sharalary júrgizilýde.
Aıta keteıik, áleýmettik nysandardyń qurylysy Sybaılas jemqorlyqqa qarsy qyzmettiń erekshe baqylaýynda.