Almaty oblysynda «Til tazalyǵyn saqtaıyq!» aktsııasy bastaldy

TALDYQORǴAN.QazAqparat - «Til týraly» jáne «Jarnama týraly» Zańdarynyń talaptaryna sáıkes resimdelýin, olardyń saýatty jazylýyn qamtamasyz etý maqsatynda «Til tazalyǵyn saqtaıyq!» aktsııasy bastaldy. Shara 3 aıǵa jalǵasady, dep habarlaıdy QazAqparat tilshisi.

Aktsııanyń ashylý rásiminde Almaty oblysynyń tilderdi damytý jónindegi basqarmasynyń bólim basshysy Gúlnar Bitebekova sharanyń mańyzdylyǵyna toqtaldy.

«Búgingi kúni Almaty oblysy boıynsha 16 aýdan men 3 qalada da bir mezgilde bastalyp otyrǵan aktsııa 12 maýsymǵa deıin jalǵasady. Atalmysh shara aıasynda barlyq halyqqa qyzmet kórsetý nysandarynyń ıelerine zań aıasynda túsindirý jumystary júrgiziledi. Anyqtalǵan zańbuzýshylyqtar boıynsha túzetýge bir aı ýaqyt beriledi. Zań buzýshylyqtar belgilengen merzimde túzetilmegen jaǵdaıda Qazaqstan Respýblıkasynyń «Ákimshilik quqyq buzýshylyq týraly» kodeksiniń 75-babyna sáıkes ákimshilik shara qoldanylatyn bolady», dedi Bitebekova.

Esterińizge sala keteıik, atalmysh sharaǵa kez-kelgen adam qatysa alady. Qate tapqan azamattar Almaty oblysynyń tilderdi damytý jónindegi basqarmasyna jazbasha túrde, bolmasa telefon shalyp, habarlaýǵa bolady.

Jalpy aktsııanyń ashylýyna jergilikti atqarýshy organdar, qoǵamdyq uıymdar, mekeme qyzmetkerleri, ardagerler uıymy jáne buqaralyq aqparat quraldarynyń ókilderin qosqanda barlyǵy 40-tan asa adam qatysty.