Almaty oblysynda terrorızmnen qorǵaný talaptaryn saqtamaǵan 31 nysanǵa aıyppul salyndy

TALDYQORǴAN. QazAqparat - Almaty oblysynyń polıtseıleri nysandardy tekserý jumysyn aıaqtady. Shara  barysynda birqatar mekemelerdiń jetekshilerine 8 mıllıon teńge aıyppul salyndy, dep habarlaıdy QazAqparat tilshisi.

«Qazirgi tańda 1412 mekeme tekserildi. Terrorızmnen qorǵaný talaptaryna beı-jaı qaraǵan 31 nysannyń basshysy jaýapkershilikke tartyldy. Onyń ishinde 11 bilim berý uıymy, 7 qoǵamdyq tamaqtandyrý nysany jáne birqatar saýda, mádenıet, densaýlyq saqtaý jáne sý sharýashylyǵy nysandary bar. Salynǵan aıyppuldardyń jalpy somasy 8 mıllıon teńge. Sonymen qatar, bizdiń tekserýler nátıjesinde anyqtalǵan kemshilikterdi túzetý týraly 413 nusqama berildi», - dep málimdedi Almaty oblystyq  Polıtsııa departamentiniń baspasóz qyzmeti.

Aıta keteıik, atalǵan tekserýge oblystyq Ekstremızmge qarsy is-qımyl basqarmasy uıtqy bolǵan. Olar bıyl dástúrli emes din ustaýshylarynyń qatysy bar 20 qylmysty anyqtaǵan.

«Anyqtalǵan faktiler jalpyqylmystyq sıpatqa ıe. Onyń ishinde qorqytyp alýdyń 2 deregi, zańsyz medıtsınalyq qyzmet kórsetýdiń 2 deregi, qaraqshylyqtyń 3, adam tonaýdyń 1 deregi bar. Sondaı-aq, densaýlyqqa qasaqana aýyr zııan keltirý, alaıaqtyq, zorlyq kórsetý, urlyq, qarý-jaraqty jáne esirtkini zańsyz saqtaý sııaqty zańbuzýshylyqtar bar. Ákimshilik zańnamany saqtaý boıynsha 9 zańbuzýshylyq anyqtaldy. Olardyń ishinde  ekstremıstik sıpattaǵy materıaldardy saqtaý, tirkelmegen dinı uıymdardyń qyzmetine aralasý jáne ózge de derekter bar»,- dep atap ótti baspasóz qyzmeti.

Sonymen qatar, oblystyń tártip saqshylary bıyl lańkestik akti týraly jalǵan habarlama berýdiń eki deregi tirkelip, «telefon ázilkeshteri» QR Qylmystyq kodeksiniń 273-babyna sáıkes jaýapkershilikke tartylǵanyn jetkizdi.