Almaty oblysynda sýǵa ketken qyzdyń otbasyna 1 mln teńge kómek beriledi

TALDYQORǴAN. QazAqparat - Almaty oblysynyń ákimdigi sýǵa batyp, kóz jumǵan qyzdyń týystaryna materıaldyq kómek beretin boldy. Bul jóninde marqumnyń týystaryna kóńil aıtyp barǵan Taldyqorǵan qalasynyń ákimi Ǵalymjan Ábdiraıymov aıtty, dep habarlaıdy QazAqparat tilshisi.

Taldyqorǵan qalasynyń ákimi sýǵa ketken qyzdyń úıine baryp, marqumnyń jaqyndaryna kóńil aıtty. Bes kún boıy Aınagúl Nurjanqyzyn izdestirý sharasynyń basy-qasynda birge júrgen Ǵ.Ábdiraıymov jaǵdaıdan habardar ekenin aıtty.

«Bes kún boıy men jandaryńyzda júrip, týystaı bolyp kettim. Janyńyz qalaı kúızeletinin de men bilemin. Búgin, mine, Almaty oblysynyń ákimi Amandyq Batalovtyń tapsyrmasymen kómek retinde bir mıllıon teńge kómek beremiz. Oǵan qosa, budan bylaı da medıtsınalyq, psıhologııalyq kómek beriledi», - dedi ákim.

«Sizderdiń bes kún boıy qalaı jumys istep, qanshama adamdy jumyldyrǵanyńyzdy kórdik. Tehnıkamen qamtamasyz etip, qyzymyzdy izdep tapqandaryńyz úshin rahmet», - dep kózine jas aldy marqumnyń apasy.

Esterińizge sala ketsek, 5 shilde kúni 14 jastaǵy Aınagúl Qaratal ózenine aǵyp ketken. Jasósipirmniń denesin izdeýge 300-ge jýyq adam jumyldyrylǵan bolatyn. Іzdestirýshiler alty kún boıy ózenniń arnasyn buryp, qarqyndy jumys júrgizdi. Marqumnyń denesi altynshy kúni tabyldy. Jasóspirimniń aıaǵy ózendegi tasqa tirelip qalǵanyn habarlaǵan bolatynbyz.