Almaty oblysynda soǵys ardagerlerine qurmet kórsetildi
Ekinshi dúnıejúzilik soǵysynyń 64 ardageri men 136 tyl eńbekkerine kontserttik baǵdarlama men baǵaly syılyqtar usynyldy. Qart qonaqtardy bolashaq Otan qorǵaýshylar - Іle aýdanyndaǵy kadet synybynyń oqýshylary qarsy aldy, dep habarlaıdy QazAqparat tilshisi.
"Sizderdiń jastyq shaqtaryńyz Ekinshi dúnıejúzilik soǵys kezeńimen qatar keldi, soǵystan keıin de búlingen sharýashylyqty qalpyna keltirip, eldiń eńsesin qaıta kóterdińizder. Sizder qıyndyq pen aýyrtpalyqtyń bárin abyroımen jeńe bildińizder. Sol úshin de oblysymyzdyń barlyq ardagerlerine shyn júrekten alǵysymdy bildiremin. Búgingideı Jeńis meıramy qarsańynda Sizderge myqty densaýlyq, uzaq ǵumyr tileımin", - dedi shara barysynda oblys ákimi Amandyq Batalov.
Saltanatty keshte ardagerler de tilekterin bildirip, jınalǵandardy merekemen quttyqtady. Olardyń qatarynda Eńbekshiqazaq aýdanynyń turǵyny,soǵys ardageri Soltanbaı Jaryqbasov, tyl eńbekkeri, taldyqorǵandyq Aleksandr Mosko da bar.
Memleket basshysynyń jan-jaqty qoldaýyn sezinip otyrǵandaryn aıta kele ardagerler osyndaı syı-qurmettiń arqasynda ýaqyt tezine, syrqatqa moıymaı, boılaryn tik ustap kele jatqandaryn jetkizdi. Jurtshylyqty Uly Jeńis merekesimen jáne Otan qorǵaýshylar kúnimen quttyqtap, ashyq aspan, beıbit ómir, elimizdiń ósip-órkendeýine tilektestikterin bildirdi.
Jalpy, Almaty oblysynda Ekinshi dúnıejúzilik soǵysynyń 190 ardageri, 13 myńǵa jýyq tyl eńbekkeri bar. Jyl saıyn Jeńis kúnine oraı soǵysqa qatysýshylar men múgedekterine oblystyq bıýdjetten birrettik materıaldyq kómek úshin qarjy bólinedi. Soǵan sáıkes bıylǵy jyly ár ardagerge 150 myń teńgeden beriletin bolady. Sonymen qatar tegin sanatorlyq emdelýge, kommýnaldyq tólemder men qajetti quraldarmen qamtamasyz etýge qarjy qarastyrylǵan.