Almaty oblysynda shaǵyn jáne orta bıznes qarqyndy damyp jatyr
Bıýdjetke túsken salyq kólemi 518,5 mln. teńgeni qurap, jalpy jergilikti bıýdjetke túsken salyq túsimderine shaqqanda úles salmaǵy 57,4 paıyzdy qurap otyr. Bul týraly Eskeldi aýdanynyń ákimi Jubanysh Noǵaıbekov Jetisý aýylynyń Mádenıet úıinde ótken turǵyndar aldyndaǵy esep berý jıynynda aıtty, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Kezdesý barysynda jasalǵan baıandamaǵa súıensek, 2016 jyldyń 1 jeltoqsanyna aýdanda 2491 shaǵyn jáne orta kásipkerlik sýbektileri qyzmet kórsetip, byltyrǵy jyldyń sáıkes kezeńimen salystyrǵanda 107 birlikke kóbeıip, 104,5 paıyzdy quraǵan. Onyń 257-si - saýda nysandary, ekeýi - saýda bazary, 113-i - qyzmet kórsetý nysandary jáne 25-i - qoǵamdyq tamaqtaný orny. 25 belsendi kásiporyn jumys istep, áktas, qum jáne qıyrshyq tas, kirpish, jıhaz, aýyl sharýashylyǵy ónimderi men nan, kondıterlik, makaron ónimderi, jartylaı fabrıkattar, shyryn syndy azyq-túlik taýarlaryn óndirýde.
Sonymen qatar esepti kezeńde aýdanda shaǵyn bıznes salasynda jalpy somasy 175,5 mln. teńgeni quraıtyn 7 jańa nysan iske qosylyp, 47 jańa jumys orny ashylǵan. Al «Bıznestiń jol kartasy-2020» baǵdarlamasy aıasynda 8 jobaǵa jalpy somasy 144,5 mln. teńge kóleminde memlekettik qoldaýlar kórsetildi.
Sondaı-aq Kásipkerler palatasymen birlesip, Aýyl sharýashylyǵyn qarjylaı qoldaý qory arqyly aýyl halqyn qoldaýǵa 10 sýbektige 49 mln. teńge nesıe berildi. Qosymsha 46 mln. teńgege 11 joba maquldanǵan.