Almaty oblysynda sańyraýqulaq terýge shyǵyp, adasyp qalǵan áıeldi túnimen izdegen

ALMATY. QazAqparat – Almaty oblysyndaǵy Tasmuryn asýy tusynda sańyraýqulaq terýge shyqqan áıel adasyp qalǵan. Qutqarýshylar ony tańǵa jýyq tapty, dep habarlaıdy QazAqparat Tótenshe jaǵdaılar mınıstrligi saıtyna silteme jasap.

15 sáýir saǵat 20:30-da Almaty oblysy TJD kezekshi bóliminiń pýltine Balqash aýdany Tasmuryn asýy mańyndaǵy Malaısary aýylynyń mańynda, taýly jerde 1962 jylǵy áıel joǵalyp ketkeni týraly habarlama túsedi. Ol kúndiz týystarymen birge sańyraýqulaq terýge kelgen (1 er adam, 2 áıel, 2 ıt). Adasyp ketken áıel kólikke qaraı keri qaıtatyn joldy taba almaı qalǵan.

16 sáýir saǵat 6.50-de izdestirý toby joǵalǵan adamdy tapty. Oǵan medıtsınalyq kómek qajet bolmady. Іzdestirý-qutqarý jumystaryna TJD 10 qyzmetkeri men 2 tehnıkasy, Respýblıkalyq-jedel-qutqarý jasaǵynan 12 qutqarýshy, 2 tehnıka jáne 1 kınologııalyq esep, Polıtsııa departamentinen 8 qyzmetker men 3 tehnıka jumyldyryldy.

TJM qutqarýshylary taýda qalǵan týrısterge barlyq qaýipsizdik sharalaryn saqtaýǵa keńes beredi:

- dene daıarlyǵyn esepteńiz

- qutqarý qyzmetteriniń usynystaryn eskerińiz: aýa raıy, kóshkin qaýpi

- ózińizge qajetti zattardy ala júrińiz: paýerbank, sý ótkizbeıtin pakettegi sirińke, sý, qosymsha jyly kıim-keshek, GPS navıgatory.

Eger sizge kómek qajet bolsa, 112 nemese 8 [phone] (TJM Respýblıkalyq jedel-qutqarý jasaǵynyń kezekshi-dıspetcherlik bólimshesi) nómirlerine qońyraý shalyńyz.