Almaty oblysynda sadaqa jáshigin buzǵan áıel ustaldy
Almaty oblystyq Polıtsııa departamenti baspasóz qyzmetiniń málimetinshe, oqıǵa Jambyl aýdanyndaǵy kesenelerdiń birinde bolǵan. Keseneniń tazalyǵy men tártibine qarap, táý etip kelýshilerge járdem berýshi tulǵa kesene ishindegi sadaqa jáshiginiń qulpy buzylǵanyn jáne ishindegi qarajattyń qoldy bolǵanyn anyqtaǵan.
«Kesenedegi sadaqa jáshiginiń qoldy bolǵany týraly habar tústi. Qylmysqa qatysy bar degen kúdikpen 39 jastaǵy áıel adam polıtsııa bólimshesine jetkizildi. Onyń jaqyn aýyldardyń biriniń turǵyny ekeni anyqtaldy. Kúdiktiden qoldy bolǵan qarajat tárkilendi. Atalǵan derek boıynsha QR Qylmystyq kodeksiniń 188-babyna sáıkes, sotqa deıingi tergeý amaldary júrgizilip jatyr»,- dedi Jambyl aýdany polıtsııa bóliminiń bastyǵy polıtsııa polkovnıgi Ashan Tegenbaev.
Tergeý barysynda kúdiktiniń buǵan deıin kesenege kelip, qarjy salynǵan jáshiktiń esh baqylaýsyz turǵanyna kóz jetkizgeni belgili boldy. Kelesi joly daıyndyqpen kelgen áıel jáshiktiń qulpyn buzyp, ishindegi qarajatty alyp ketken.
Kúdikti áıel mekenjaıyn ózgertpeý týraly mindettememen bosatyldy. Onyń budan ózge de osyǵan uqsas qylmystarǵa qatysy bar-joǵy tekseriletin bolady.