Almaty oblysynda radıkaldy toptardy joıý sharalary jalǵasýda

NUR-SULTAN. QazAqparat – QR Іshki ister mınıstrliginiń deregi boıynsha, Almaty oblysyndaǵy antıterrorıstik operatsııa kezinde 20 adam ustalǵan. Olardan 40 oq atatyn qarý men 500-den astam oq-dári tárkilendi. Bul týraly QazAqparat 24.kz-ke silteme jasap habarlaıdy.

Óńirde radıkaldy toptardyń kózin joıý jumystary jalǵasyp jatyr. Qalanyń shyǵa berisinde blokpostar qoıylǵan. Áskerı qyzmetshiler avtomobılder men jolaýshylardyń qujattaryn tekserip jatyr. Óńirlik polıtsııa departamentiniń habarlaýynsha,búginnen bastap baqylaý-ótkizý beketteri oblys ortalyǵynyń ózine de ornatyldy. Polıtsııa ókilderi turǵyndardan asqan bir qajettilik bolmasa, kóshege shyqpaýdy suraıdy.

Buǵan deıin habarlaǵanymyzdaı, oblys komendanty Serik Kúdebaev halyqty sabyrlyqqa shaqyryp, asa qajettiliksiz úıden shyqpaýǵa keńes berdi.

«Qazirgi ýaqytta jaǵdaı baqylaýda. Tirshilikti qamtamasyz etý nysandary shtattyq rejımde jumys istep tur. Turǵyndardan jaǵdaıǵa túsinistikpen qaraýdy, sabyrlyq saqtaýdy jáne úıde qalýdy suraımyz.

Oblys aýmaǵynda terrorıstik qaýiptiń «qyzyl» tótenshe deńgeıi engizilgenin taǵy eske salamyn. Zańdy talaptarǵa baǵynbaǵan jaǵdaıda quqyq qorǵaý organdary tabandy sharalar qabyldaıtyn bolady, tipti qarý qoldanýǵa deıin», - dedi Serik Kúdebaev.