Almaty oblysynda polıtseıler stýdent qyzdardy ózin qorǵaýǵa úıretti

TALDYQORǴAN. QazAqparat - Almaty oblystyq Jergilikti polıtsııa qyzmeti basqarmasynyń qyzmetkerleri jańa oqý bastalýyna oraı Taldyqorǵan qalasyndaǵy kolledjderdiń stýdentterimen kezdesý ótkizdi, dep habarlaıdy QazAqparat tilshisi.

Іs-sharaǵa qatysqan jasóspirim qyzdarǵa quqyqtyq saýattylyqty arttyrý, zorlyq-zombylyq túrleri men odan qorǵaný joldary, kúızelisti jeńý tásilderi týraly túsindirý jumystary júrgizildi.

Kezdesýde taqyrypty ashý maqsatynda polıtseılerdiń arnaıy ázirlegen beınerolıkteri kórsetildi. Beınerolıkterde áleýmettik jelilerdegi tanysý nemese beıtanys jandarǵa kózsiz sený, túnde qydyrý qyzdardyń zorlyq-zombylyq qurbany bolýyna ákelýi múmkin ekeni túsindirildi. Sonymen qatar, beıtanys kólikterge otyrý, bóten adamdarmen qonaqqa barý, jaqyndaryna eskertpesten úıden shyǵyp ketý, ishimdikter men esirtki ónimderine úıir bolýdyń sońy jaqsylyqqa aparmaıtyny aıtyldy.

Sonymen qatar, Polıtsııa departamentiniń jaýyngerlik kúres nusqaýshysy Baýyrjan Aqanuly jastarǵa ózin-ózi qorǵaýdyń qarapaıym aıla-tásilderin úıretti. Túrli sıtýatsııalyq jaǵdaılarǵa taldaý jasap, shabýyldaýshy men qorǵanýshynyń psıhologııalyq erekshelikterine toqtaldy. Ádisterdi is-tájirıbede kórsetip, sheberlik sabaǵyn ótkizdi.

«Qyzdarǵa qorǵaný maqsatynda ózimen birge ysqyryqt, kiltter jıyntyǵyn, túrli spreılerdi, ıaǵnı dezodoranttar, shashqa arnalǵan laktardy alyp júrýdiń artyq etpeıdi. Bastysy – jaǵdaıdy durys baǵamdap, qolda bar zattardy tıimdi paıdalaný. Zorlyq-zombylyq oryn alýy múmkin oryndardan múmkindiginshe aýlaq júrýi qajet. Degenmen, ondaı jaǵdaı oryn alsa, jınaqy bolyp, birden qorǵaný sharalaryn qabyldaýy tıis»,- dep atap ótti polıtsııa ókilderi.