Almaty oblysynda órtten qaza tapqandardyń otbasyna kómek kórsetiledi

TALDYQORǴAN.QazAqparat - Almaty oblysynda úıimen birge órtenip ketken otbasynyń jaqyndaryna jergilikti bılik kóńil aıtyp, qaıǵysyna ortaqtasty. Qara jamylǵan otbasyna qajetti kómek kórsetiledi, dep habarlaıdy QazAqparat tilshisi.

Eńbekshiqazaq aýdany ákimi baspasóz qyzmetiniń málimetinshe, úı órtengen kezde otaǵasy jumysta bolǵan. Al 1985 jyly týǵan áıel 2008 jáne 2014 jylǵy eki balasymen birge úıde bolǵan. Ókinishke qaraı, úsheýi de tirideı janyp ketti. Oqıǵa ornynan olardyń jartylaı kúıip ketken deneleri tabyldy.

«Qara jamylǵan úıelmenniń bir balasy ǵana aman qaldy. Ul bala kórshi kóshede turatyn ata-apasynyń qolynda bolǵan. Eńbekshiqazaq aýdanynyń ákimi Bınáli Ysqaq bastaǵan aýdan basshylary otbasynyń jaqyndaryna baryp, kóńil aıtty. Qajetti kómek kórsetiledi», - dep málimdedi Eńbekshiqazaq aýdany ákiminiń baspasóz qyzmetinen.

Qazir órttiń shyǵý sebepteri anyqtalý ústinde. Sondaı-aq aýdan ákimi jergilikti jaýapty mamandarǵa turǵyn úılerdiń árqaısysyna baryp, qysqa daıyndyǵyn tekserýdi tapsyrdy.

Eske sala keteıik, keshe túnde Almaty oblysynda áıel men onyń eki balasy órtten kóz jumǵan bolatyn.