Almaty oblysynda oqýshy hıkaıany komıks arqyly jetkizedi

TALDYQORǴAN. QazAqparat - Almaty oblysy Aqsý aýdany Jansúgirov aýylynyń turǵyny Asyl Murat búginde kitap oqýdyń jańa jolyn komıks arqyly jetkizip júr. Ol balalarǵa arnalǵan ertegini sýret arqyly aıtady, dep habarlaıdy QazAqparat tilshisi.

Asyl J.Sydyqov atyndaǵy orta mektebiniń 6-synyp oqýshysy. Bala kezinen qolyna qalam alyp, kórgen mýltfılmderiniń sýretterin sala bastaǵan.

Beıneleýge qyzyǵýshylyǵy sonshalyq áńgimeni oqyǵannan góri ony sýret arqyly kórsetkendi jaqsy kóredi.

Alǵash salǵan óneri «Ponı» atty balalarǵa arnalǵan týyndynyń sýretteri bolatyn. Qazirgi tańda «Jalqaý ara» ertegisiniń komıksin salyp, balalarǵa usyndy.

«Asyl 3-synyptan bastap bilim saıystaryna belsene qatysyp júrgen shákirtterimizdiń biri. Jylda júldeli oryndardy ıelenip, ár saıysta ustazdaryn qýantyp júredi. Boıyndaǵy qabileti de jyl ótken saıyn ushtala túsip júr. Nátıjesinde Asyl kóptegen jetistikterge jetip otyr. Atap aıtsaq, «Rýsskıı medvejonok» halyqaralyq ıntellektýaldyq baıqaýynda 1-oryn, respýblıkalyq «Stıhı o voıne» baıqaýynda 1-oryn, respýblıkalyq Pýshkın oqýlarynyń 2-oryn ıegeri jáne taǵy da basqa jarystardyń júldegeri atandy», - dedi orys tili pániniń muǵalimi Nazgúl Seıtqojanova.

Aıta keteıik, Asyl qazirgi tańda «Meniń atym Qoja» shyǵarmasynyń komıksin salyp jatyr.

Sonymen qatar, jas daryn «Fabrıka slov» halyqaralyq baıqaýyna joldama aldy.