Almaty oblysynda merdiger oryndalmaǵan jumysy úshin 180 mln teńge alǵan

QONAEV. QazAqparat - Sybaılas jemqorlyqqa qarsy is-qımyl agenttiginiń Almaty oblysy boıynsha departamenti «Monolıt» JShS qatysty zańsyzdyqty anyqtady, dep habarlaıdy QazAqparat tilshisi.

Agenttiktiń Almaty oblysy boıynsha departamenti «Pure Pack» JShS kompanııasynyń alkogolsiz sýsyndar óndirý zaýytyn sýmen jabdyqtaý, sý burý jáne elektrmen jabdyqtaý jónindegi syrtqy ınjenerlik jelilerge uzaq ýaqyt qosý faktisin zerttep jatyr. 2020 jyly kompanııa «Bıznestiń jol kartasy-2025» baǵdarlamasy sheńberinde jobany memlekettik qoldaý men qarjylandyrýdy alý úshin kásipkerlik jáne ındýstrııalyq-ınnovatsııalyq damý basqarmasynyń oń sheshimin alǵan.

Osy sheshimniń negizinde basqarma men «Monolıt» JShS arasynda 385 mln teńgege syrtqy ınjenerlik jelilerdi salý boıynsha jumystardy oryndaýǵa shart jasaldy. Injenerlik jelilerdi salý jumystary 2021 jyldyń maýsymynda bastaldy jáne bastapqy aıaqtalý merzimi 2021 jyldyń qazan aıyna belgilengen bolatyn.

Aldyn ala málimetter boıynsha, bólingen qarajattyń shamamen 80 %-y aýdarylǵan. Al is júzinde 180 mln teńgeden astam qarajat negizsiz tólenip otyr. Olar boıynsha oryndalǵan jumystar joq.

Sonymen qatar, jobanyń merzimi birneshe ret keıinge qaldy jáne sońǵy ózgeristerge sáıkes jobany aıaqtaý 2023 jyldyń naýryzyna josparlanǵan.

Óz kezeginde, qalyptasqan jaǵdaılar «Pure Pack» JShS-niń óndiristi tolyqqandy iske qosý jónindegi qyzmetin shektep otyr. Tıisinshe, jergilikti halyqty jumysqa ornalastyrý boıynsha zaýyttyń áleýeti iske asyrylmaǵan kúıinde qalǵan. Tıisti salyq túsimderi joq, óńirdiń ınvestıtsııalyq ahýaly ýshyǵyp tur.

«Sybaılas jemqorlyqqa qarsy qyzmet merdigerlik uıymnyń jumysyna tıisti baqylaýdy qamtamasyz etý, jobany jedel aıaqtaý jáne»Pure Pack«JShS zaýyt óndirisin tolyqqandy iske qosý úshin óńir basshylyǵynyń atyna aqparattyq hat daıyndady», - dedi departament basshysy Serik Orymbetov.

Onyń málimetinshe, bıznesti memlekettik qoldaýǵa bólinetin qarajattyń maqsatty paıdalanylýyn baqylaý óndiristi iske qosýǵa deıingi barlyq kezeńderde súıemeldenýge tıis.

Memlekettik organdardyń laýazymdy adamdary tarapynan bızneske zańsyz kedergi jasaý boıynsha shaǵym kelip túsken jaǵdaıda sybaılas jemqorlyqqa qarsy qyzmet qylmystyq-quqyqtyq yqpal etý sharalaryn qoldanatyn bolady.