Almaty oblysynda mádenıet, sport jáne týrızm salasynda jetistikter kóp - mınıstr
Mınıstrdiń aıtýynsha, Prezıdenttiń 5-shi qazandaǵy halyqqa arnaǵan Joldaýyndaǵy maqsat-mindetterdiń basym bóligi Almaty oblysymen tikeleı baılanysty, dep habarlaıdy QazAqparat tilshisi.
Saltanat saraıynda óńirdiń mádenıet jáne sport salasy qyzmetkerlerimen kezdesken mınıstr Prezıdenttyń bul jolǵy Joldaýy áleýmettik máselelerdi sheshýge baǵytalǵanyn erekshe atap ótti. Jalaqynyń ósýi, muǵalim mártebesiniń artýy, ómir súrý sapasyn jaqsartý máseleleri tikeleı el turǵyndaryna baǵyttalyp otyr, degen Arystanbek Muhamedıuly Almaty oblysynda óz salasy boıynsha atqarylyp jatqan ıgi jumystarǵa toqtaldy.
«Óńirdiń mádenıet, sport jáne týrızm salasynda jetistikter kóp. Ár azamat óziniń jumysyn erekshe bir yntamen istep jatsa, árıne ol Almaty oblysynan erekshe kórinip jatady. Ony mysaly týrızm salasynan ańǵarýǵa bolady. Bıyl Elbasynyń Alakólge baryp, aıdyndy kól Qazaqstannyń injý marjanyna aınalýy kerek degen úndeý aıtty. Nátıjesinde týrızm salasy jandanyp keledi, Alakólge 1 mıllıonnan astam týrıst keldi. Jaqyn arada qazaq drama teatry ashylaıyn dep jatyr. Mundaı jaǵdaıdy biz maqtanyshpen aıtýymyz kerek. Sport salasynda da halyqaralyq jarystarda top jaryp jatqan sportshylar, talantty jastar kóp. Sol jaǵynan biz tek qana alǵysymyzdy bildirýimiz kerek», - dedi Arystanbek Muhamedıuly.