Almaty oblysynda əleýmettik joba jeńimpazy 1 mln teńge ıelendi

TALDYQORǴAN. QazAqparat - Almaty oblysynda «Qazaqstannyń úzdik áleýmettik jobalary» baıqaýynyń aımaqtyq kezeńiniń jeńimpazy anyqtaldy. Múmkindigi shekteýli Nurbolat Qarabasovtyń múgedekter arbasyna elektr qozǵaltqysh ornatý jobasy úzdik atandy, dep habarlaıdy QazAqparat tilshisi.

Baıqaýǵa Almaty oblysynda tirkelgen qoǵamdyq birlestikter men qaıyrymdylyq qorlardan 24 ótinish túsken. Olardyń on tórti irikteý kezeńine joldama aldy. Jobalardyń ishinde múgedekter arbasyn elektr qozǵaltqyshpen jabdyqtaý, múmkindigi shekteýli jandardy ońaltý, áleýmettik bıznes-ınkýbator syndy tyń ıdeıalardy erekshe atap ótýge bolady. Úzdikterdi 13 adamnan quralǵan arnaıy komıssııa anyqtady.

«Komıssııa músheleriniń sheshimi ádil ári naqty boldy esepteımin. Uıǵarym boıynsha birinshi oryndy «Teń múmkindiktermen qamtamasyz etý» baǵyty boıynsha jeke kásipker Nurbolat Qarabasovtyń «Gulsar» múgedekter arbasyn elektrmen jabdyqtaý jobasy jeńip aldy», - deıdi «Nur Otan» partııasy oblystyq fılıaly tóraǵasynyń birinshi orynbasary Ǵalıasqar Sarybaev.

Ekinshi oryndy múmkindigi shekteýli azamattardy jumysqa ornalastyrý, psıhologııalyq kómek kórsetý jobasynyń jetekshisi «Rakhym» qaıyrymdylyq qorynan Raýshan Baıtanova ıelense, úshinshi orynǵa «Áleýmettik problemalardy sheshýdegi aqparattyq jyljý» baǵytynda «Alpamys» qoǵamdyq birlestiginiń áleýmettik bıznes ınkýbatory jobasymen Gúlǵana Nazyrova qol jetkizdi.

Jalpy bul óńirde 900 deı úkimettik emes uıym bolsa, olardyń 300-den astamy belsendi jumys istep keledi. Al eń úzdik joba respýblıkalyq baıqaýda tanystyrylatyn bolady.