Almaty oblysynda qujatsyz mal tasymaldaǵan 400-den asa azamat jaýapqa tartyldy
Almaty oblystyq Polıtsııa departamenti baspasóz qyzmetiniń málimetinshe, olardyń 261-i tekserý barysynda óziniń menshik quqyǵyn qujatpen rastaı almady. Sol sebepti olarǵa QR ÁQBtK-nyń 406-babyna sáıkes (QR-nyń veterınarııa salasyndaǵy zańnamasyn buzý) ákimshilik hattama rásimdeldi.
«Aldyn alý sharalary mal urlyǵy derekterin 4,5%-ǵa qysqartýǵa múmkindik bergenin atap ótken jón. Qylmystyń basym bóligi táýlik ishinde «izi sýymaı» ashylýda. Sonymen qatar, jazanyń bultartpastyǵy qaǵıdatyna sáıkes, buryn jasalǵan 70-ke jýyq urlyq ashyldy. Mal urlyǵy úshin 112 adam qylmystyq jaýapkershilikke tartyldy. 28 qylmystyq top ustalyp, 506 mal basy ıelerine qaıtaryldy. Onyń 28-i jylqy, 75-i iri qara mal, 403-i usaq mal»,-dep statıstıkalyq derekterimen bólisti Almaty oblysy PD Krımınaldyq polıtsııa basqarmasynyń bastyǵy polıtsııa podpolkovnıgi Daýren Sakenov.
Aqpan aıynda iri qara maldy urlaýǵa mamandanǵan alty adamnan turatyn iri qylmystyq top áshkerelendi. Olar jalpy sany 33 mal basyn urlaǵan. Olardyń osyǵan uqsas 15 qylmysqa qatystylyǵy dáleldendi.
«Maldy alyp júrý úshin Qazaqstan Respýblıkasy Aýyl sharýashylyǵy mınıstriniń 2015 jylǵy 21 mamyrdaǵy № 7-1/453 «Veterınarııalyq qujattardy berý qaǵıdalaryn jáne olardyń blankilerine qoıylatyn talaptardy bekitý týraly» buıryǵyndaǵy №7 qosymshaǵa sáıkes mal ıelerinde ózimen birge veterınarııalyq anyqtama (№1 nysan), mal pasporty, maldyń sáıkestendirý nómiri (syrǵa, chıp jáne t. b.) bolýy qajet»,-dep tolyqtyrdy Daýren Sakenov.